შვედეთის პრემიერი პირდაპირ და აშკარად უყენებს პირობას უკრაინას, რომ ლგბტ თემის ლეგალიზება თუ არ მოხდა უკრაინაში, ვერ გახდება ევროკავშირის წევრი, – ამის შესახებ „ხალხის ძალის“ აღმასრულებელმა მდივანმა, გურამ მაჭარაშვილმა განაცხადა.
მაჭარაშვილმა კომენტარი გააკეთა შვედეთის პრემიერ-მინისტრის განცხადებაზე, სადაც ულფ კრისტენსონმა აღნიშნა: „უკრაინაში ერთნაირსქესიან წყვილებს არ შეუძლიათ ქორწინება, LGBTQI თემის სრული სამართლებრივი დაცვა მნიშვნელოვანია უკრაინის ევროკავშირთან დაახლოებისთვის, შვედეთი ყურადღებით დააკვირდება, რომ ეს ვალდებულება შესრულდეს“.
მაჭარაშვილის შეფასებით, ეს არის აღიარებითი ჩვენება და შვედეთის მთავრობის ხელმძღვანელი ევროპული ბიუროკრატიის უმრავლესობის აზრს აჟღერებს.
როგორც მაჭარაშვილმა აღნიშნა, ამას ითხოვდნენ საქართველოსგანაც ვიზალიბერალიზაციის შესანარჩუნებლად.
„ჩვენ, „ხალხის ძალა“, 2022 წლიდან ყოველთვის ვამბობდით, რომ ჯერ კულუარებიდან იყო ზეწოლა საქართველოს სახელმწიფოსა და საზოგადოებაზე, შემდეგ უკვე საჯაროდ დაიწყო ზეწოლა იმასთან დაკავშირებით, რომ საქართველოშიც უნდა ყოფილიყო ლგბტ პროპაგანდა. უნდა ყოფილიყო ერთნაირსქესიანთა ქორწინება. როდესაც გვეუბნებოდნენ: „აბა, ვინ ითხოვს ერთნაირსქესიანთა ქორწინების დაკანონებას, ტყუილებს რატომ საუბრობთო“, იმის შემდეგ ეს რამდენჯერმე ოფიციალურად გაჟღერდა, მათ შორის, რეზოლუციებშიც ჩაიწერა.
შვედეთის პრემიერი პირდაპირ და აშკარად პირობას აყენებს უკრაინასთან დაკავშირებით, რომ ლგბტ თემის ლეგალიზება თუ არ მოხდა უკრაინაში, ის ვერ შევა და ვერ გახდება ევროკავშირის წევრი. ახლა რაღას იტყვიან, ახლაც იმას ხომ არ იტყვიან, რომ ეს არ არის შვედეთის პრემიერი, ან მას ეს არ უთქვამს, ან ლგბტ პროპაგანდა სხვა რამეს ნიშნავს, ვიდრე საქართველოს სთხოვენ? ეს ხომ პირდაპირი აღიარებითი ჩვენებაა. შვედეთი არ არის ევროკავშირის ის ქვეყანა, რომელსაც მარტო თავის აზრი აქვს. ბუნებრივია, ევროპულ ბიუროკრატიაში უმრავლესობის აზრს აჟღერებს. აი, რას ითხოვენ იმის სანაცვლოდ, რომ საქართველოში ვიზალიბერალიზაცია შენარჩუნდეს, რაც რეზოლუციაში ჩაწერეს. თურმე უნდა გავაუქმოთ არასრულწლოვანთა დაცვის შესახებ კანონი და ბავშვები არ დავიცვათ ასეთი გაუკუღმართებული ცხოვრებისგან. ვინმეს თუ კიდევ ეჭვი ეპარებოდა და კითხვის ნიშნები ჰქონდა, აბა, ვინ გვაძალებს ერთნაირსქესიანთა ქორწინებასო, აი, პირდაპირ უთხრეს უკრაინას – ერთსქესიანთა ქორწინებას თუ არ დაარეგულირებ, ვერ გახდები ევროკავშირის წევრიო. ახლა ჩამწკრივდეს ყველა „ნაცმოძრაობაში“ და ე.წ. ენჯეოსექტორში, მათ შორის ევროკავშირის ელჩი, და აგვიხსნან, ეს რას ნიშნავს. უკრაინას თუ უთხრეს, ჩვენც ხომ გვეტყვიან“, – აღნიშნა მაჭარაშვილმა.