არ დავუშვებთ იმას, შესაბამისი ინსტიტუტებიც თავის მხრივ, რომ არჩევნების მშვიდ და უსაფრთხო გარემოში ჩატარებას რამენაირად ხელი შეეშალოს, – განაცხადა გადაცემა „დღის ქრონიკაში“ ცენტრალური საარჩევნო კომისიის თავმჯდომარე გიორგი კალანდარიშვილმა 4 ოქტომბრის არჩევნებთან დაკავშირებით.
მისივე თქმით, არსებობს გარკვეული რისკები, რომლებთან დაკავშირებითაც შესაბამის უფლებამოსილ ინსტიტუციებთან მჭიდრო კოორდინაციით ყველა საკითხს მაქსიმალურად გადააზღვევენ.
„რაც შეეხება მოახლოებულ 4 ოქტომბრის არჩევებს, სადაც შესაბამის მუნიციპალიტეტებში რეგისტრირებული პირები მერებს, საკრებულოს პროპორციულ და მაჟორიტარულ წევრებს აირჩევენ, ამ შემთხვევაში ჩვენ გამოვკვეთეთ გასულ წელთან მიმართებაში საკითხები, რომლებიც სპეკულაციის კუთხით იყო გამოყოფილი.
მათ შორის, გახსოვთ თქვენ, რომ იყო ბიულეტენზე უკანა მხარეს გამოჟონვის შემთხვევები, იყო სხვა საკითხები, რომელთა ტექნიკური და სამართლებრივი გადაზღვევები პროცესში უკვე განვახორციელეთ, რაც მნიშვნელოვანია იმისთვის, რომ სპეკულაციების ხარისხი შევამციროთ. რა თქმა უნდა, კიდევ არსებობს გარკვეული რისკები, რომლებთან დაკავშირებითაც ჩვენ შესაბამის უფლებამოსილ ინსტიტუციებთან მჭიდრო კოორდინაციით ყველა საკითხს მაქსიმალურად გადავაზღვევთ. რა თქმა უნდა, არ დავუშვებთ იმას, შესაბამისი ინსტიტუტებიც თავის მხრივ, რომ არჩევნების მშვიდ და უსაფრთხო გარემოში ჩატარებას რამენაირად ხელი შეეშალოს“, – აღნიშნა გიორგი კალანდარიშვილმა.