„ლელოს“ ლიდერს მამუკა ხაზარაძეს თანამდებობის პირთა წლევანდელ ქონებრივ დეკლარაციაში არ აქვს მითითებული შემოსავალი იჯარიდან, რომელიც გერმანიის ელჩისთვის წლების განმავლობაში მიქირავებული სახლიდან მიიღო. ხაზარაძე, რომელიც სკანდალში გაეხვა, პიტერ ფიშერისგან მიღებულ შემოსავალს მალავს ქონებრივ დეკლარაციაშიც, რომელიც 2025 წლის 27 იანვრითაა დათარიღებული.
სკანდალური საქმის შესახებ ოთხდღიანი დუმილის შემდეგ არანაკლებ სკანდალური აღმოჩნდა მამუკა ხაზარაძის აღიარება. „ლელოს“ ლიდერმა დაადასტურა, რომ თითქმის 4 წელი სახელმწიფო ბიუჯეტს გერმანულ ფულს უმალავდა და გადასახადების გადახდას თავს არიდებდა. ამის მიზეზად მან ტექნიკური გაუგებრობა დაასახელა.
„ჩვენ მიერვე წინა კვირას აღმოჩენილ იქნა ბიუჯეტში გადასახადის საკითხი, რაც წყაროსთან დაბეგვრა – არდაბეგვრის გაუგებრობამ გამოიწვია. ჩვენივე მიმართვის საფუძველზე საგადასახადო სამსახურში მოხდა შესაბამისი რეგისტრაცია და ბიუჯეტი სრულად იქნა გასტუმრებული, რითაც საკითხი სრულად ამოიწურა“, – წერს ხაზარაძე სოციალურ ქსელში.
ამასთან, გერმანიის ელჩი ამ დრომდე არ პასუხობს კითხვას, რა თანხას იხდის ოპოზიციონერი ლიდერის ფეშენებელურ რეზიდენციაში, იყო თუ არა კანონი დაცული ხელშეკრულების გაფორმებისას და როგორ შედგა გარიგება.