ინდოეთის საგარეო საქმეთა სამინისტრო ოფიციალურ განცხადებას აქვეყნებს, რომლითაც აშშ-ის პრეზიდენტის, დონალდ ტრამპის ბრალდებებს პასუხობს რუსული ნავთობის იმპორტთან დაკავშირებით.
„ინდოეთი გახდა აშშ-ისა და ევროკავშირის კრიტიკის ობიექტი უკრაინის კონფლიქტის დაწყების შემდეგ რუსეთიდან ნავთობის იმპორტის გამო. სინამდვილეში ინდოეთმა რუსეთიდან იმპორტი იმიტომ დაიწყო, რომ ტრადიციული მიწოდება კონფლიქტის დაწყების შემდეგ ევროპისკენ გადამისამართდა. ამ პერიოდში შეერთებული შტატები აქტიურად უჭერდა მხარს ინდოეთის მიერ ამგვარ იმპორტს, გლობალური ენერგეტიკული ბაზრების სტაბილურობის გასაძლიერებლად“, – აღნიშნულია განცხადებაში.
ინდოეთის მთავრობა აცხადებს, რომ ნავთობის იმპორტი პრაქტიკული აუცილებლობაა, რადგან ქვეყანას სჭირდება პროგნოზირებადი და ხელმისაწვდომი ენერგორესურსები ინდოელი მომხმარებლებისთვის.
ინდოეთის საგარეო საქმეთა სამინისტროს მიერ გავრცელებულ განცხადებაში აღნიშნულია, რომ სწორედ ის ქვეყნები, რომლებიც მათ აკრიტიკებენ, თავადაც ვაჭრობენ რუსეთთან, მაგრამ მათ შემთხვევაში ეს არ არის სასიცოცხლოდ მნიშვნელოვანი.
ინდოეთის საგარეო უწყება ზუსტ ციფრებს ასახელებს.
„2024 წელს ევროკავშირს რუსეთთან 67.5 მილიარდი ევროს ორმხრივი ვაჭრობა ჰქონდა საქონელზე. გარდა ამისა, ჰქონდათ მომსახურების ვაჭრობა, რომელიც 2023 წელს 17.2 მილიარდ ევროს შეადგენდა. ეს მნიშვნელოვნად აღემატება ინდოეთის მთლიან სავაჭრო ბრუნვას რუსეთთან იმ წელს ან შემდგომ პერიოდში. 2024 წელს ევროპაში თხევადი ბუნებრივი აირის იმპორტმა, ფაქტობრივად, რეკორდულ, 16.5 მილიონ ტონას მიაღწია, რითიც გადააჭარბა 2022 წლის ბოლო რეკორდულ მაჩვენებელს – 15.21 მილიონ ტონას“, – აცხადებენ ინდოეთის საგარეო უწყებაში.
როგორც განცხადებაში ვკითხულობთ, ევროპასა რუსეთს შორის ვაჭრობა არა მხოლოდ ენერგორესურსებს მოიცავს, არამედ სასუქებს, სამთო-სამრეწველო პროდუქტებს, ქიმიკატებს, რკინასა და ფოლადს, ასევე სატრანსპორტო აღჭურვილობასაც.
ამასთან, განცხადებაში წერია, რომ აშშ განაგრძობს რუსეთიდან გარკვეული ნედლეულის იმპორტს.
„ამ ფონზე ინდოეთის მიზანში ამოღება არასამართლიანი და არაგონივრულია. ნებისმიერი მსხვილი ეკონომიკის მსგავსად, ინდოეთი მიიღებს ყველა აუცილებელ ღონისძიებას თავისი ეროვნული ინტერესებისა და ეკონომიკური უსაფრთხოების დასაცავად“, – აღნიშნულია განცხადებაში.
მანამდე აშშ-ის პრეზიდენტმა, დონალდ ტრამპმა განაცხადა, რომ მნიშვნელოვნად გაზრდის ტარიფებს ინდოეთისთვის რუსული ნავთობის იმპორტისა და „გადაყიდვის“ გამო. აშშ-ის პრეზიდენტის თქმით, ინდოეთი არა მხოლოდ ყიდულობს რუსული ნავთობის უზარმაზარ რაოდენობას, არამედ შეძენილი ნავთობის დიდ ნაწილს ღია ბაზარზე ყიდის დიდი მოგების მისაღებად.