თბილისის სახელმწიფო უნივერსიტეტში ცნობილი მწერლის, ებრაული ფილოსოფიის მკვლევრისა და მთარგმნელის, შალომ დავიდისადმი მიძღვნილი ინტერდისციპლინური სამეცნიერო კონფერენცია გაიხსნა.
უნივერსიტეტის ინფორმაციით, ღონისძიებაზე თსუ რექტორმა, აკადემიკოსმა, ჯაბა სამუშიამ შალომ დავიდი ქართულ-ებრაული ურთიერთობების განვითარებაში შეტანილი განსაკუთრებული წვლილისათვის უნივერსიტეტის ოქროს მედლით დააჯილდოვა.
„უზომოა ის ღვაწლი, რომელიც შალომ დავიდს მიუძღვის ქართველი და ებრაელი ხალხების ურთიერთობების გაძლიერებაში. მისი წვლილი ქართულ-ებრაული ურთიერთობების კვლევის მიმართულებით ძალიან დიდია. მან მთელი თავისი ცხოვრება მიუძღვნა ამ საქმიანობას. სწორედ მისნაირ ადამიანებზე დგას ქართულ-ებრაული ურთიერთობები“, – აღნიშნა ჯაბა სამუშიამ.
შალომ დავიდმა მადლობა გადაუხადა უნივერსიტეტს ჯილდოსთვის.
„ქართველი და ებრაელი ხალხების 26-საუკუნოვანი მეგობრობა ვერ ეტევა ვერცერთ ჩარჩოში, ის უსაზღვროა. ეს ღონისძიებაც ქართველი და ებრაელი ხალხების მეგობრობას ეძღვნება და ეს ჯილდო ებრაელი ხალხისადმი მიძღვნილი ჯილდოა“, – აღნიშნა შალომ დავიდმა.
კონფერენციას გახსნას საქართველოს განათლების, მეცნიერებისა და ახალგაზრდობის მინისტრის მოადგილე თამარ მახარაშვილი, ისრაელის საელჩოს წარმომადგენლები, შალომ დავიდის ოჯახის წევრები, პროფესორები, სტუდენტები, მოწვეული სტუმრები ესწრებოდნენ.
შალომ დავიდისადმი მიძღვნილი ინტერდისციპლინური სამეცნიერო კონფერენცია თსუ ჰუმანიტარულ მეცნიერებათა ფაკულტეტის, საქართველოს მეცნიერებათა ეროვნული აკადემიის, დავით ბააზოვის სახელობის საქართველოს ებრაელთა და ქართულ-ებრაულ ურთიერთობათა ისტორიის მუზეუმის ორგანიზებით გაიმართა.
თსუ-ის ჰუმანიტარულ მეცნიერებათა ფაკულტეტის დეკანის დარეჯან თვალთვაძის თქმით, შალომ დავიდი არის ადამიანი, რომელმაც შეძლო ერთდროულად ორი სამყაროს ქართული და ებრაული კულტურის ჰარმონიული დაკავშირება.
„ის არის საზოგადო მოღვაწე, რომელმაც დატოვა მნიშვნელოვანი კვალი არა მარტო ისრაელის, არამედ საქართველოს თანამედროვეობაში. კონფერენციაზე ბევრი საინტერესო მოხსენებაა წარმოდგენილი. ახალგაზრდებს შესაძლებლობა აქვთ გაეცნონ შალომ დავიდის როგორც სამეცნიერო, ისე საზოგადოებრივ საქმიანობას და მოისმინონ მოხსენებები ქართულ-ებრაულ ურთიერთობებზე“, – განაცხადა დარეჯან თვალთვაძემ.
ღონისძიებაზე შალომ დავიდმა წაიკითხა საჯარო ლექცია „ბიბლიისა და თანამედროვე მეცნიერების შეხების წერტილები“. სამეცნიერო კონფერენციაზე წარმოდგენილი იყო მოხსენებები: „შალომ დავიდის რეფლექსიები რაბი შნეურ ზალმანის კაბალისტურ ფილოსოფიაზე“, „ისრაელში გამოცემული ქართულენოვანი რელიგიური ლიტერატურა − შალომ დავიდის „ჰაფტაროთ“, „საქართველოს ებრაელთა და ქართულ-ებრაულ ურთიერთობათა ისტორიის ფურცლები“, „ფრაზეოლოგიური იდიომი მცირე წინასწარმეტყველთა ძველ ქართულ თარგმანებში“, „ბიბლიის ტექსტი არაბიბლიურ ხელნაწერებში“, „შირ ჰაშირიმის“ ქართული თარგმანი: „ქებათა-ქება შელომო მეფისა“ და სხვა.
სამეცნიერო კონფერენციის შემდეგ, შალომ დავიდისადმი მიძღვნილი ღონისძიებების ფარგლებში, გაიმართება სტუდენტთა XII სამეცნიერო კონფერენცია „თარგმანისა და ლიტერატურულ ურთიერთობათა აქტუალური პრობლემები“, რომლის ორგანიზატორია თსუ ჰუმანიტარულ მეცნიერებათა ფაკულტეტი, თარგმანისა და ლიტერატურული ურთიერთობების ს/ს ინსტიტუტი, ოთარ ბაქანიძის სახელობის უკრაინისტიკის ცენტრი და ისრაელის ცენტრი.
შალომ დავიდისადმი მიძღვნილი ღონისძიებების ფარგლებში თსუ მუზეუმში გაიხსნა გამოფენა, რომელზეც წარმოდგენილი იყო შალომ დავიდის ცხოვრების და მოღვაწეობის ამსახველი მასალები, მისი მემორიალური ნივთები, სამეცნიერო მემკვიდრეობა. გამოფენაზე ასევე წარმოდგენილი იყო ცნობილი ქართველი მხატვრის გიორგი (გია) გუგუშვილის მიერ ძველი აღთქმის ერთ-ერთი წიგნის „ქებათა ქების“ მოტივებზე შექმნილი ნამუშევრები.