ცნობილი იტალიელი მსახიობი კლაუდია კარდინალე 87 წლის ასაკში გარდაიცვალა. ინფორმაციას იტალიური მედია ავრცელებს.
მედიის ცნობით, ის საფრანგეთის ქალაქ ნემურში ოჯახის წევრების გარემოცვაში გარდაიცვალა.
კარდინალეს გარდაცვალებას გამოეხმაურა საფრანგეთის პრეზიდენტი ემანუელ მაკრონი. „კლაუდია კარდინალე განასახიერებდა თავისუფლებას, ხედვასა და ნიჭს, რამაც ბევრი რამ შესძინა დიდებული ადამიანების მოღვაწეობას რომიდან ჰოლივუდამდე და პარიზამდე, რომელიც მან საკუთარ სამშობლოდ აირჩია. ჩვენ, ფრანგები სამუდამოდ შევინახავთ ჩვენს გულებში კინოს ისტორიის იტალიისა და მსოფლიო ვარსკვლავს“, – დაწერა მაკრონმა სოციალურ ქსელ X-ში.
კარდინალე დაიბადა 1938 წლის 15 აპრილს ტუნისში სიცილიელი ემიგრანტების ოჯახში. ის 150-ზე მეტ ფილმში გადაიღეს. კარდინალე ისეთი იტალიელი რეჟისორების მუზა იყო, როგორებიც იყვნენ ფედერიკო ფელინი და ლუკინო ვისკონტი.