მდგრადი, ინკლუზიური და სიცოცხლისუნარიანი ეკონომიკისთვის – საქართველოს საგარეო საქმეთა მინისტრი გაეროს გენერალური ასამბლეის სამიტზე სიტყვით გამოვიდა.
მაკა ბოჭორიშვილის განცხადებით, ამ პლატფორმამ უნდა უზრუნველყოს სამართლიანი და მდგრადი განვითარებისთვის აუცილებელი რესურსების, პოლიტიკური ნებისა და თანამშრომლობის მობილიზება. პირველმა დიპლომატმა სამიტის მონაწილეებს საქართველოს მხრიდან ამ ხედვის სრულად ერთგულება დაუდასტურა.
მაკა ბოჭორიშვილმა საქართველოს ეკონომიკის ზრდაზე, განახლებადი ენერგიის სექტორში ჩადებულ ინვესტიციასა და რეგიონული ენერგეტიკული უსაფრთხოების განსამტკიცებლად გადადგმულ ნაბიჯებზე ისაუბრა.
„რეგიონში არსებული გაურკვევლობისა და გარე შოკების მიუხედავად ჩვენ შევინარჩუნეთ მარკო ეკონომიკური სტაბილურობა გონივრული ფისკალური და მონეტარული პოლიტიკის მეშვეობით. ხოლო ბოლო ოთხი წლის განმავლობაში საქართველოს ეკონომიკა საშუალოდ 9,7%-ით გაიზარდა. ჩვენ ვდებთ ინვესტიციებს განახლებადი ენერგიის სექტორში, კლიმატის ცვლილებასთან დაკავშირებული მიზნების მისაღწევად და რეგიონული ენერგეტიკული უსაფრთხოების განსამტკიცებლად, ვავითარებთ ისეთ სტრატეგიულ ინფრასტრუქტურას, როგორიცაა შავი ზღვის წყალქვეშა კაბელი და ანაკლიის ღრმაწყლოვანი პორტი ევროპასა და აზიას შორის კავშირის გასაძლიერებლად.
ჩვენ ვამაყობთ საქართველოს, როგორც ღია ვაჭრობის ჰაბის ფუნქციით, თავისუფალი ვაჭრობის შესახებ გაფორმებული 16 შეთანხმება საქართველოს უხსნის ევროკავშირის, ჩინეთის, ევროპის თავისუფალი ვაჭრობის ასოციაციის, გაერთიანებული სამეფოსა და დსთ-ს ქვეყნების ბაზრებს, რომლებიც 2,3 მილიარდ მომხმარებელს აერთიანებს. ეს კი გლობალური პარტნიორობის განვითარებისა და ინვესტიციების მოზიდვის რეალურ შესაძლებლობებს გვთავაზობს. ყველა ეს მიღწევა შესაძლებელი გახდა საქართველოში უსაფრთხოების კუთხით არსებული გამოწვევებისა და რუსეთის მხრიდან აფხაზეთისა და ცხინვალის რეგიონების უკანონო ოკუპაციის მიუხედავად“, – განაცხადა მაკა ბოჭორიშვილმა.