მეტი პარადოქსი რაღა უნდა მოხდეს, როდესაც „ჰელსინკის პაქტის” ქვეყნის საგარეო საქმეთა მინისტრი არღვევს სხვა სახელმწიფოს სუვერენულ უფლებებს და უხეშად ერევა მის შიდა საქმეებში, – წერს „ხალხის ძალის“ წევრი თამარ ჩიბურდანიძე სოციალურ ქსელში და ამგვარად აფასებს ეუთოს მოქმედი თავმჯდომარის, ფინეთის საგარეო საქმეთა მინისტრის მიერ გადადგმულ ნაბიჯს, როდესაც ის რუსთაველის გამზირზე რადიკალების აქციას დაესწრო და მათ მიმართ თანადგომა გამოხატა.
როგორც ჩიბურდანიძე აღნიშნავს, საქართველოს ხელისუფლებამ ადეკვატური შეფასება მისცა ფინეთის საგარეო საქმეთა მინისტრის ქმედებას და მომავალში ითანამშრომლებს მათთან, ვინც დემოკრატიის პრინციპებს დაიცავს და არა მათთან ვინც უხეშად ერევა ქვეყნის შიდა საქმეებში.
„ფინეთის საგარეო საქმეთა მინისტრის მისვლა რუსთაველის გამზირზე და არაობიექტური განცხადებები, კიდევ ერთხელ ამყარებს ჩვენს პოზიციებს ევროპაში მიმდინარე დემოკრატიის უკუსვლაზე. მეტი პარადოქსი რაღა უნდა მოხდეს, როდესაც „ჰელსინკის პაქტის” ქვეყნის საგარეო საქმეთა მინისტრი არღვევს სხვა სახელმწიფოს სუვერენულ უფლებებს და უხეშად ერევა მის შიდა საქმეებში?
ვეთანხმები პარლამენტის თავმჯდომარეს, რა ფასი აქვს საოკუპაციო ხაზთან ფინეთის საგარეო საქმეთა მინისტრის განცხადებებს, როდესაც რუსთაველზე ჩვენს სუვერენიტეტს არღვევს? ასევე, მივესალმები საქართველოს პრემიერ-მინისტრის ღირსეულ გადაწყვეტილებას შეხვედრის გაუქმების თაობაზე.
საქართველოში ცრუ დემოკრატიის ეპოქა დასრულდა და ფინეთის მინისტრის მსგავსად, მთელი ევრობიუროკრატია რუსთაველზე რომ დადგეს, ამ პროცესებს ვეღარავინ შეაბრუნებს.
მოვუსმენთ მხოლოდ მას, ვინც ჯერ საკუთარ ქვეყანაში იცავს დემოკრატიის პრინციპებს და შემდეგ ჩვენთან ცდილობს სამართლიანობის პარიტეტის დაცვას. სხვა შემთხვევაში, ყველა უცხოელის განცხადება, რომელიც დემოკრატიის პრინციპებს სცილდება და შეურაცხყოფას აყენებს ჩვენი ქვეყნის სუვერენულ უფლებებს, ასევე არაფრად აგდებს ქართველი ხალხის არჩევანს, ორი ყურის პოლიტიკით გავატარებთ. საბედნიეროდ, ვისწავლეთ უკვე საკუთარი ქვეყნისადმი პატივისცემა და მართვა“, – წერს თამარ ჩიბურდანიძე.