საფრანგეთის უმაღლესმა ადმინისტრაციულმა სასამართლომ (სახელმწიფო საბჭო) არ დააკმაყოფილა მარინ ლე პენის მიერ საარჩევნო წესების გასაჩივრება, რის გამოც მას ამ ეტაპზე 2027 წლის საპრეზიდენტო არჩევნებში კენჭისყრის უფლება არ აქვს. ინფორმაციას ამის შესახებ სააგენტო Reuters-ი ავრცელებს.
ლე პენი მარტში გაასამართლეს ევროპარლამენტში ყალბ სამუშაო ადგილებთან დაკავშირებული თაღლითობისთვის. მას მიესაჯა ოთხი წლით თავისუფლების აღკვეთა, საიდანაც ორი წელი პირობითია, და 100 ათასი ევროს ოდენობის ჯარიმა.
მას ასევე ხუთი წლით აეკრძალა არჩევით თანამდებობებზე, მათ შორის საპრეზიდენტოზე, კენჭისყრა. ეს აკრძალვა ძალაშია მიუხედავად იმისა, რომ ლე პენმა გადაწყვეტილება გაასაჩივრა და ის ჯერ საბოლოოდ არ შესულა ძალაში.
ლე პენი ამტკიცებს, რომ აკრძალვის შესახებ კანონის დაუყოვნებლივი ამოქმედება უსამართლოდ ლახავს მის პოლიტიკურ უფლებებს.
„დღეს სახელმწიფო საბჭომ არ დააკმაყოფილა ეს აპელაცია, რადგან ის მიზნად ისახავდა არა მარეგულირებელი დებულებების გაუქმებას, არამედ კანონში ცვლილებების შეტანას, რაც პრემიერ-მინისტრის უფლებამოსილებას სცილდება“, – განაცხადეს საფრანგეთის სახელმწიფო საბჭოში.