იმ პირობებში, როდესაც FARA-ს კანონმდებლობა ძალიან კარგად და წარმატებით მუშაობს ამერიკის შეერთებულ შტატებში, გაუგებარია ვენეციის კომისია, რატომ გვიკრძალავს ქართველებს, რომ გვქონდეს იდენტური გამჭვირვალობა და, შესაბამისად, ვაკონტროლოთ უცხოური გავლენები ჩვენს ქვეყანაში, – ამის განაცხადა საქართველოს პარლამენტის თავმჯდომარის მოადგილემ, ნინო წილოსანმა.
მისივე თქმით, როგორც ჩანს ვენეციის კომისიამ გადაწყვიტა, რომ გამჭვირვალობა უკანონოდ გამოაცხადოს და ის საფუძვლები, რომლებიც ჩვენს კანონმდებლობას, მათ შორის, გამჭვირვალობის შესახებ იქნება ეს თუ FARA-სთან იდენტურ კანონს აქვს, აღნიშნოს, რომ ეს კანონი არ ეკუთვნის საქართველოს.
„იმ პირობებში, როდესაც FARA-ს კანონმდებლობა ძალიან კარგად და წარმატებით მუშაობს ამერიკის შეერთებულ შტატებში, გაუგებარია ვენეციის კომისია რატომ გვიკრძალავს ქართველებს, რომ გვქონდეს იდენტური გამჭვირვალობა და შესაბამისად ვაკონტროლოთ უცხოური გავლენები ჩვენს ქვეყანაში. ასევე, საინტერესო არის, რომ მათ დასკვნაში მინიმუმამდე არის დაყვანილი სამართლებრივი არგუმენტები და უფრო მეტად აპელირება ხდება პოლიტიკურ გადაწყვეტილებაზე, რაც ვფიქრობ, რომ არც ვენეციის კომისიის და არც რომელიმე სხვა გარე აქტორის გადასაწყვეტი არ არის. ამ კუთხითაც, აღნიშნული დასკვნა არის საკმაოდ უხეში ჩარევა საქართველოს სუვერენიტეტში“, – აღნიშნა ნინო წილოსანმა.
ვენეციის კომისია ამერიკული „ფარას“ კანონის ანალოგის გაუქმებას ითხოვს. კომისიამ შესაბამისი რეკომენდაცია გამოსცა. ვენეციის კომისია აღნიშნავს, რომ ამერიკული „ფარას“ ანალოგი საქართველოში, კანონის უზენაესობას უქმნის საფრთხეს. კომისია აკრიტიკებს გრანტების, მაუწყებლობისა და მოქალაქეთა პოლიტიკური გაერთიანებების შესახებ კანონებსაც.