უკრაინის საგარეო საქმეთა მინისტრი ანდრეი სიბიგა აშშ-ის პრეზიდენტ დონალდ ტრამპსა და რუსეთის ლიდერს ვლადიმერ პუტინს შორის შემდგარ სატელეფონო საუბარს სოციალურ ქსელ X-ში გამოეხმაურა.
როგორც სიბიგამ აღნიშნა, შორი მანძილზე მოქმედი „ტომაჰავკის“ ტიპის ფრთოსანი რაკეტების შესახებ მსჯელობამ პუტინი აიძულა ამერიკასთან დიალოგს დაუბრუნდეს.
„აშშ-ის პრეზიდენტისა და პუტინის სატელეფონო საუბარი იმის დემონსტრირებაა, თუ როგორ აიძულა პუტინი „ტომაჰავკის“ რაკეტების შესახებ მსჯელობამ ამერიკასთან დიალოგს დაუბრუნდეს. დასკვნა მდგომარეობს იმაში, რომ ჩვენ ძლიერი ნაბიჯების გადადგმა უნდა გავაგრძელოთ. ძალას შეუძლია მშვიდობას იმპულსი მისცეს. რუსებს სტრატეგიული ინიციატივა აღარ აქვთ. ერთადერთი ინსტრუმენტი, რომელიც მათ აქვთ, ეს არის ჩვენი ენერგეტიკული სისტემის ტერორი და იმედი, რომ ზამთარს იარაღად გამოიყენებენ“, – დაწერა სიბიგამ.
უკრაინის პირველმა დიპლომატმა აგრეთვე დასძინა, რომ საკმარისი ძალა და გამბედაობა ევროპას მშვიდობას მოუტანს, როგორც ეს ახლო აღმოსავლეთში მოხდა.
ცნობისთვის, გუშინ ტრამპმა და პუტინმა მორიგი სატელეფონო საუბარი გამართეს. მოლაპარაკებების დასრულების შემდეგ თეთრი სახლის ლიდერმა განაცხადა, რომ უახლოეს მომავალში ის პუტინს უნგრეთის დედაქალაქ ბუდაპეშტში შეხვდება.