საქართველოს პარლამენტის პირველი ვიცე სპიკერი გიორგი ვოლსკი საქართველოს მიმართ ევრობიუროკრატიის დამოკიდებულებას აფასებს. მისი განცხადებით, ევრობიუროკატიას სურს, მოახდინოს რუსეთის აგრესიის დივერსიფიცირება საქართველოსკენ.
„ეს არის ევრობიუროკრატიის რაღაც ახალი სახეობა, რომელიც ბოლო პერიოდში წარმოიშვა და გეგმაზომიერად მუშაობს იმისათვის, რათა ამ საბრძოლო დაპირისპირებაში, ამ ომში გარკვეული უპირატესობა მოიპოვოს, რომელიც რუსეთის აგრესიასთან არის დაკავშირებული. უპირატესობას განაპირობებს ამ აგრესიის დივერსიფიცირება საქართველოსკენ.
რასაკვირველია, ამ შემთხვევაში თუ „ქართული ოცნების“ ხელისუფლება იქნება ქვეყანაში, ეს მიზანი განუხორციელებელია. საჭიროა, მარიონეტული, ისეთი ხელისუფლების გაჩენა, რომელიც დაექვემდებარება ნებისმიერ ინსტრუქციას. აქედან გამომდინარეობს ყველა ნაბიჯი, ყველა განცხადება“, – განაცხადა გიორგი ვოლსკიმ.
საქართველოს პარლამენტის თავმჯდომარე შალვა პაპუაშვილი 4 ოქტომბერს პრეზიდენტის სასახლის შტურმზე ბრიუსელის დუმილს სოციალურ ქსელში გამოეხმაურა. „მე-13 დღეა, ბრიუსელი პრეზიდენტის სასახლის ძალადობრივ შტურმს არ გმობს. სირცხვილია”, – დაწერა პარლამენტის თავმჯდომარემ.
ევრობიუროკრატიის დამოკიდებულება შეაფასა საქართველოს პრემიერ-მინისტრმა. ირაკლი კობახიძემ განაცხადა: „ევროკომისიის პრესსპიკერმა პირდაპირი მხარდაჭერა გამოუცხადა დამხობის მცდელობას, ამის შემდეგ მათ მეტი პასუხისმგებლობა ეკისრებოდათ, დაეგმოთ სასახლეში შეჭრის მცდელობას, თუმცა ამ ფონზეც კი ისინი დუმან, რაც ზოგადად მეტყველებს ევროპულ ბიუროკრატიაში არსებულ მძიმე მდგომარეობაზე“.