„ჰამასის“ ლიდერი ხალილ ალ-ჰაია აცხადებს, რომ დაჯგუფება მზადაა, ისრაელს დარჩენილი 15 მძევლის ცხედრები გადასცეს, თუმცა ამისთვის მას მეტი დრო და მძიმე ტექნიკა დასჭირდება.
არხ „ალ-ქაჰირა ალ-ახბარიასთან“ ინტერვიუში ჰაიამ განაცხადა, რომ ცხედრებამდე მისვლა რთულია, რადგან ზოგიერთი მათგანი მიწის ან ნანგრევების ქვეშ იმყოფება.
„ჩვენ მზად ვართ, შეთანხმების შესაბამისად, ავიღოთ და გადავცეთ [მძევლების] ყველა ცხედარი; ჩვენ არ გვაქვს სურვილი, ვინმე ჩვენთან დავტოვოთ – დაე, ისინი თავიანთ ნათესავებს დაუბრუნდნენ და ჩვენი მოწამეებიც დაბრუნდებიან და ღირსეულად დაიკრძალებიან“, – განაცხადა მან.
ცნობისთვის, დაჯგუფება „ჰამასი“ დიდი ხანია, აცხადებს, რომ დარჩენილი გარდაცვლილი მძევლების ადგილსამყოფელის დასადგენად დამატებითი ტექნიკა სჭირდება.
ისრაელი „ჰამასს“ ტყუილში ადანაშაულებს და ამბობს, რომ მას მოკლე დროში თითქმის ყველა ცხედრის დაბრუნება შეუძლია. დაჯგუფების მხრიდან შეთანხმების პუნქტების დარღვევის გამო ისრაელმა ღაზის სექტორში სამხედრო ოპერაცია გარკვეული დროით განაახლა.