უკრაინის პრეზიდენტმა ვოლოდიმირ ზელენსკიმ განაცხადა, რომ ოფიციალური კიევი რუსეთთან ცეცხლის შეწყვეტისთვის და მოლაპარაკებებისთვის მზადაა, თუმცა არა ტერიტორიების დათმობის ხარჯზე.
„უკრაინა მზად არის გადავიდეს დიპლომატიაზე. ჩვენ ცეცხლის შეწყვეტის საკითხს მხარს ვუჭერთ. ჩვენ დიპლომატიისთვის მზად ვართ, თუმცა არა იმ პირობით, რომ საიდანღაც გავიდეთ, აგრესორს მიწა, ტერიტორია ვაჩუქოთ. რა თქმა უნდა, საუბარი არაა კილომეტრებზე. საუბარია ჩვენ სახლებზე, ხალხზე, ისტორიაზე, იდენტობაზე. ეს ჩვენი ტერიტორიული მთლიანობაა“, – თქვა ზელენსკიმ შვედეთის პრემიერ-მინისტრთან ულფ კრისტერსონთან გამართულ ერთობლივ პრესკონფერენციაზე.
როგორც უკრაინის ლიდერმა აღნიშნა, მას ამ საკითხზე საუბარი აშშ-ის პრეზიდენტთან დონალდ ტრამპთან ჰქონდა, მაგრამ საკითხი მდგომარეობს იმაში, რომ რუსეთი დიპლომატიისთვის მზად არ არის.