უკრაინის პრეზიდენტმა, ვოლოდიმირ ზელენსკიმ ევროპული საბჭოსადმი დღევანდელი მიმართვისას ევროპელ ლიდერებს შორ მანძილზე მოქმედი შეიარაღების მიწოდებისკენ მოუწოდა.
ზელენსკიმ განაცხადა, რომ Tomahawk-ის ტიპის რაკეტები ევროპაშიც არის ხელმისაწვდომი და კონკრეტულ ქვეყნებთან ამ საკითხზე მოლაპარაკებებს აწარმოებს.
მისი თქმით, ვლადიმირ პუტინს ესმის, რომ შორ მანძილზე მოქმედ შეიარაღებას უკრაინაში ომის მსვლელობის შეცვლის ძალა აქვს.
„როდესაც ჩვენ ვსაუბრობთ შორ მანძილზე მოქმედ იარაღზე, მაგალითად, უკრაინისთვის, ჩვენ ვგულისხმობთ, რომ პუტინის რეჟიმმა ამ ომის რეალური შედეგები უნდა იგრძნოს. და მე მოგიწოდებთ, მხარი დაუჭიროთ ყველაფერს, რაც უკრაინას მსგავსი შესაძლებლობების მოპოვებაში დაეხმარება, რადგან ეს რუსეთისთვის ნამდვილად ქმნის სხვაობას“, – განაცხადა უკრაინის პრეზიდენტმა.