გამოცემა The Wall Street Journal-ის ინფორმაციით, აშშ-ის პრეზიდენტს დონალდ ტრამპს მრჩევლებმა რუსეთის დასანქცირების სამი გზა შესთავაზეს – მსუბუქი, საშუალო და მძიმე. თეთრი სახლის ლიდერმა მოცემულ ეტაპზე საშუალო ვარიანტი აირჩია.
როგორც გამოცემა იუწყება, მიუხედავად იმისა, რომ ტრამპს მოთმინების ფიალა აევსო, მას ჯერ კიდევ აქვს იმედი, რომ რუსეთთან გარიგებას მიაღწევს.
The Wall Street Journal-ის ცნობით, ტრამპს მოთმინების ფიალა აევსო მას შემდეგ, რაც მან დაადგინა, რომ რუსეთის პრეზიდენტი ვლადიმერ პუტინი დროს წელავს. სატელეფონო საუბრის შემდეგ, რა დროსაც ბუდაპეშტში რუსეთ-ამერიკის სამიტის ჩატარება დაიგეგმა, რუსეთმა უკრაინა დაბომბა.
ტრამპმა უკრაინის დაბომბვის კომენტირებისგან თავი შეიკავა, თუმცა, როგორც მისი ადმინისტრაციის თანამშრომლები ამბობენ, ის ამგვარი აგრესიით გაოცებული იყო, რადგან ფიქრობდა, რომ პუტინთან საუბრის დროს პროგრესს მიაღწია.
ტრამპს სანქციების სამი ვარიანტი შესთავაზეს: მკაცრი, რომელიც რუსული მრეწველობისა და რუსი მაღალჩინოსნების წინააღმდეგ იქნებოდა შემოღებული, საშუალო, რომელიც რუსული ენერგეტიკული სექტორის წინააღმდეგ იქნებოდა მიღებული, და რბილი, რომელიც მეტად შეზღუდული იქნებოდა. ტრამპმა საშუალო ვარიანტი აირჩია.