მძევლების ცხედრების ძიების გაფართოების ფარგლებში ისრაელმა წითელი ჯვრისა და ეგვიპტის ჯგუფებს ღაზაში შესვლის უფლება მისცა, – ამის შესახებ ინფორმაციას „სქაი ნიუსი“ ავრცელებს.
მედია ისრაელის მთავრობის წარმომადგენელზე დაყრდნობით იუწყება, რომ საერთაშორისო ჯგუფებს ღაზაში ისრაელის სამხედრო საზღვრის გადაკვეთის უფლება მიეცათ.
„მძევლების ცხედრების მაძიებელ საერთაშორისო ჯგუფებს ღაზაში ისრაელის სამხედრო საზღვრის გადაკვეთის უფლება მიეცათ. ისრაელმა იცის, რომ „ჰამასმა“ იცის, სად იმყოფებიან ჩვენი გარდაცვლილი მძევლები. თუ „ჰამასი“ მეტ ძალისხმევას გამოიჩენდა, ჩვენი მძევლების ნეშტების დაბრუნებას შეძლებდა“, – განაცხადა ისრაელის მთავრობის წარმომადგენელმა.
ცნობისთვის, „ჰამასმა“ მძევლების ცხედრების ძებნის გაფართოების შესახებ მას შემდეგ განაცხადა, რაც 25 ოქტომბერს დასახმარებლად ადგილზე ეგვიპტის ჯგუფი ექსკავატორითა და ბულდოზერებით ჩავიდა. ჯგუფი ძებნის პროცესში წითელ ჯვართან თანამშრომლობს. სამხედრო საზღვარი კი, რომელსაც ხშირად „ყვითელ ხაზს“ უწოდებენ, არის ისრაელის თავდაცვის ძალების არმიის საზღვარი ღაზაში, რომელიც ცეცხლის შეწყვეტის შეთანხმებით არის დადგენილი.
ამასთან, ისრაელ-„ჰამასს“ შორის დადებული შეთანხმების თანახმად, დაჯგუფებას ყველა დარჩენილი მძევალი, რაც შეიძლება მალე უნდა დაებრუნებინა, თუმცა, გავრცელებული ინფორმაციით, ბოლო ხუთი დღის განმავლობაში „ჰამასს“ ისრაელისთვის არცერთი ცხედარი არ გადაუცია. მანამდე დაჯგუფებაში არაერთხელ განაცხადეს, რომ უკლებლივ ყველა მძევლის დაბრუნებას დრო და შესაბამისი აღჭურვილობა დასჭირდებოდა, რადგან ცხედრების ნაწილი მიწის ან ნანგრევების ქვეშ იმყოფება.