დასავლეთი ცდილობს, რუსეთისგან მოწყვიტოს სამხრეთ კავკასიისა და ცენტრალური აზიის ქვეყნები საკუთარი თანამშრომლობის სტრუქტურების ჩამოყალიბების გზით, ხოლო მოსკოვი ყველა არსებული საშუალებით აღკვეთს ასეთ მცდელობებს, – ამის შესახებ განცხადება რუსეთის საგარეო საქმეთა მინისტრმა, სერგეი ლავროვმა მინსკში გამართულ ევრაზიული უსაფრთხოების მესამე საერთაშორისო კონფერენციის შემაჯამებელ პრესკონფერენციაზე გააკეთა.
„ნატო და ევროკავშირი ქმნიან საკუთარ დიალოგებსა და თანამშრომლობის სტრუქტურებს ცენტრალური აზიისა და სამხრეთ კავკასიის ქვეყნებთან და ეს კავშირები დასავლეთს სურს, გამოიყენოს არა ორმხრივი სარგებლისთვის, არამედ იმისთვის, რომ მოწყვიტოს ეს ქვეყნები რუსეთს. ასეთ ტენდენციებს ჩვენ ყველა არსებული, დიპლომატიური, პოლიტიკური და ეკონომიკური საშუალებებით, რა თქმა უნდა, აღვკვეთთ“, – განაცხადა სერგეი ლავროვმა.
რუსეთის საგარეო უწყების ხელმძღვანელმა აღნიშნა, რომ რუსეთი „არასოდეს დაეთანხმება იმას, რომ ცენტრალური აზიასა და სამხრეთ კავკასიაში მისი მოკავშირეებისა და თანამოაზრეების კეთილ ნებას ვინმე ბოროტად იყენებდეს“ და რომ მათ „რუსეთთან დაპირისპირებისკენ უბიძგებდნენ, რაც სრულიად მიუღებელია მათი ეკონომიკური და პოლიტიკური ინტერესების თვალსაზრისით“.