ამ დრომდე უცნობია, რა ბედი ეწია კონგოელი ამბოხებულების ტყვეობაში, რამდენიმე თვის წინ, ჩავარდნილ ქართველ მფრინავ სოსო ოსურაულს, – ამის შესახებ სამხრეთ აფრიკაში საქართველოს ელჩმა ბექა დვალმა განაცხადა.
რაც შეეხება საქართველოს საგარეო საქმეთა სამინისტროში 24 მაისს გამართულ ბრიფინგს, სადაც ითქვა, რომ ქართველო მფრინავი დიდი ალბათობით დაიღუპა, ელჩი განმარტავს, რომ აღნიშნული ინფორმაცია იმ დაჯგუფებისგან მიიღეს, რომლის დაქვემდებარებაშიც სოსო ოსურაული იყო.
,,იმ მომენტში, ჩვენთვის გახდა ცნობილი, რომ შეტაკებას ჰქონდა ადგილი კონგოს დემოკრატიული რესპუბლიკის ტერიტორიაზე იმ დაჯგუფებასთან, რომლის უშუალო კონტროლის ქვეშ იმყოფებოდა საქართველოს მოქალაქე. იმ მომენტში დაიკარგა კვალი და პირველი წყაროდან მიღებული იქნა ინფორმაცია, რომ სოსო ოსურაული შესაძლოა დაღუპული ყოფილიყო. ბუნებრივია, რომ აღნიშნული ინფორმაცია ჩვენ მივაწოდეთ ოჯახსა და საზოგადოებას. იქვე ითქვა, რომ საერთაშორისო ორგანიზაციების მეშვეობით სოსო ოსურაულის ადგილსამყოფელის დადგენა მიმდინარეობდა“,- აცხადებს საქართველოს ელჩი სამხრეთ აფრიკაში.
რაც შეეხება სოციალურ ქსელში გავრცელებულ ვიდეომასალებს, ბექა დვალი აცხადებს, რომ აღნიშნული მასალა ძველია და ის რამდენიმე თვის წინ იქნა ჩაწერილი.
მფრინავი სოსო ოსურაული საქართველოს შეირაღებული ძალებიდან წასვლის შემდეგ კონგოს სამხედრო-საჰაერო ძალებში მსახურობდა.
შვეულმფრენი, რომელსაც საქართველოს მოქალაქე მართავდა, ამბოხებულმა ძალებმა 27 იანვარს ჩამოაგდეს და რამდენიმე მძევალი აიყვანეს.