უკრაინის შეიარაღებული ძალების მთავარსარდლის ოლექსანდრ სირსკის განცხადებით, სიტუაცია დონეცკის ოლქში ქალაქ პოკროვსკთან ნამდვილად რთულია, თუმცა რუსული მხარის მიერ გავრცელებული ცნობები უკრაინელი ჯარისკაცების ალყაში მოქცევის შესახებ სიმართლეს არ შეესაბამება.
„ვითარება რთულია, მაგრამ რუსული პროპაგანდის მიერ გავრცელებული ცნობები იმის შესახებ, რომ თითქოსდა პოკროვსკსა და კუპიანსკში უკრაინის თავდაცვის ძალები ბლოკირებულნი არიან, სინამდვილეს არ შეესაბამება“, – დაწერა სირსკიმ „ტელეგრამის“ საკუთარ არხზე მას შემდეგ, რაც პოკროვსკში საბრძოლო პოზიციები მოინახულა.
მისი თქმით, მტრის ჯარისკაცები ბრძოლაში არ შედიან. ისინი ქალაქის სხვადასხვა ადგილებში მაგრდებიან და ხშირად დისლოკაციის ადგილს იცვლიან. ამიტომ, როგორც სირსკი წერს, პირვანდელ ამოცანას მტრის გამოვლენა და განადგურება წარმოადგენს.
„თითოეულმა მეთაურმა, თანამდებობის მიუხედავად, უნდა უზრუნველყოს დასახული ამოცანების ხარისხიანი შესრულება. მეთაურები მკაცრად გავაფრთხილე, რომ უპასუხისმგებლობა მიუღებელია. მივიღებ მკაცრ ღონისძიებებს, გათავისუფლების ჩათვლით“, – აღნიშნა სირსკიმ.