უკრაინელი ბიზნესმენი და ვოლოდიმირ ზელენსკის მოკავშირე ტიმურ მინდიჩი ქვეყნის თავდაცვის ყოფილ მინისტრზე, რუსტემ უმეროვზე ზეწოლას ახდენდა ჯავშანჟილეტების შეძენის საქმეზე, – ამის შესახებ ინფორმაციას უკრაინული მედია ჟურნალისტ ტატიანა ნიკოლაენკოზე დაყრდნობით ავრცელებს.
მისი თქმით, ზამთარში სახელმწიფო ლოგისტიკის ოპერატორმა (DOT) გამოაცხადა ტენდერი 75 000 ჯავშანჟილეტის შესაძენად, რომლის ღირებულებაც 1.6 მილიარდ გრივნას შეადგენდა. ტენდერში ყველაზე დაბალი ფასის მქონე უცნობმა კომპანიამ, „ფორტეცია ზაშიტიმ“, გაიმარჯვა.
„ის ფაქტი, რომ მან კონტრაქტი ვერ მოიგო, მხოლოდ შემთხვევითობის საკითხი იყო – კომპანიას გაყიდვების ლიცენზია არ ჰქონდა. თუმცა უკრაინელ მწარმოებლებს ასეთი ლიცენზიები ჰქონდათ და, უკრაინელი მწარმოებლის მხარდაჭერის ნაცვლად, სახელმწიფო ლოგისტიკის ოპერატორმა ტენდერი გააუქმა, რადგან მან, უკრაინელი მწარმოებლის ინტერესებზე მეტად, მინდიჩს მიანიჭა უპირატესობა“, – განმარტა ნიკოლაენკომ.
ჟურნალისტმა დასძინა, რომ ერთი თვის შემდეგ გამოცხადდა ახალი ტენდერი 200 მილიონი გრივნაზე. ის კიდევ ერთმა უცნობმა კომპანიამ მოიგო, რომელიც ტენდერამდე ორი დღით ადრე იყო გამოსყიდული. ჟურნალისტის თქმით, ამ კომპანიამ წარადგინა იმავე ტიპის ჯავშანჟილეტები, როგორიც ადრე „ფორტეცია ზაშიტიმ“.
„რა მოხდა შემდეგ? კომპანიამ პირველი პარტია ჩააგდო. ისრაელის ჯავშანჟილეტების ნაცვლად, უკრაინაში ჩინური ნაგავი ჩავიდა – ისეთი, რომელიც ტყვიების მიმართ დაუცველი და უხარისხოდ დამზადებული იყო. და დეპარტამენტთან ყოველ შეხვედრაზე ვყვიროდი და ვეკითხებოდი, როდის აპირებდნენ ამ კონტრაქტის გაუქმებას? დეპარტამენტი არ არღვევდა ხელშეკრულებას. ახლა მესმის, რატომაც. ყოფილმა თავდაცვის მინისტრმა ვერ გაბედა მინდიჩის იგნორირება“, – დასძინა ნიკოლაენკომ.
ჟურნალისტის თქმით, კონტრაქტი საბოლოოდ გაუქმდა, მაგრამ მხოლოდ ბოლო დღეს. სახელმწიფომ ჯავშანჟილეტების საფასური არ გადაიხადა.
უკრაინის ანტიკორუფციულმა ბიურომ ტიმურ მინდიჩის სახლში ენერგეტიკულ სფეროში ქრთამის აღების საქმეზე ჩხრეკა ჩაატარა. ირკვევა, რომ ტიმურ მინდიჩმა უკრაინა მანამდე დატოვა.