აშშ-ის პრეზიდენტმა დონალდ ტრამპმა სახელმწიფო დაფინანსების შესახებ კანონს ხელი მოაწერა და ამრიგად ქვეყნის ისტორიაში ყველაზე ხანგრძლივი „შათდაუნი“ დაასრულა. ინფორმაციას Reuters-ი ავრცელებს.
სააგენტოს ცნობით, ტრამპის ხელმოწერამდე რამდენიმე საათით ადრე აშშ-ის კონგრესის წარმომადგენელთა პალატამ 222 ხლით 209 წინააღმდეგ მხარი დაუჭირა ბიუჯეტის შესახებ კანონს, რომლის წყალობითაც, სულ მცირე 2026 წლის იანვრის ბოლომდე ფედერალურ მთავრობას ფული ექნება.
Reuters-ის ცნობით, ტრამპის ხელმოწერის წყალობით ამერიკელი სახელმწიფო მოხელეები, რომლებიც 43 დღე არ მუშაობდნენ, სამუშაო ადგილებს უკვე დღეიდან დაუბრუნდებიან, თუმცა რამდენად სწრაფად აღდგება სახელმწიფო სერვისების მიწოდება, ჯერ უცნობია.
„ჩვენ ვერ დავუშვებთ, რომ ეს განმეორდეს. ქვეყნის მართვა ასე არ შეიძლება“, – განაცხადა ტრამპმა ოვალურ კაბინეტში ხელმოწერის დროს.
აშშ-ში ე.წ. შათდაუნი, რა დროსაც მთავრობა მუშაობას დროებით აჩერებს, 1 ოქტომბერს გამოცხადდა, როცა „დემოკრატმა“ სენატორებმა სახელმწიფო ბიუჯეტის შესახებ კანონპროექტს მხარი არ დაუჭირეს.