უკრაინის პრემიერ-მინისტრის იულია სვირიდენკოს განცხადებით, ქვეყნის ეროვნული ანტიკორუფციული ბიუროს მიერ მიმდინარე მასშტაბური კორუფციული სქემის გამოძიების გამო სახელმწიფო კომპანიის „ენერგოატომის“ ვიცე-პრეზიდენტი იაკობ ხარტმუტი თანამდებობიდან გადადგა.
„ვაგრძელებთ კომპლექსური ღონისძიებების გატარებას „ენერგოატომის“ მენეჯმენტის გადატვირთვის ფარგლებში. უკრაინის ეროვნული ანტიკორუფციული ბიუროდან მიღებული მასალების საფუძველზე მთავრობამ მიიღო გადაწყვეტილება სასწრაფო წესით თანამდებობა დაატოვებინოს ვიცე-პრეზიდენტს, მმართველი საბჭოს წევრს იაკობ ხარტმუტს“, – დაწერა მან.
ამასთან ერთად, როგორც სვირიდენკომ განაცხადა, მან „ენერგოატომის“ სამეთვალყურეო საბჭოს თავმჯდომარის მოვალეობის შემსრულებელს დაავალა სამსახურიდან გაათავისუფლოს „ენერგოატომის“ პრეზიდენტის მთავარი კონსულტანტი დიმიტრი ბასოვი, რომელსაც კორუფციის მუხლით ბრალი წარუდგინეს. სამსახურიდან გაათავისუფლეს აგრეთვე კომპანიის ფინანსური დირექტორი, იურიდიული დეპარტამენტის ხელმძღვანელი და შესყიდვების განყოფილების დირექტორი.
ცნობისთვის, 10 ნოემბერს უკრაინის ეროვნულმა ანტიკორუფციულმა ბიურომ მასშტაბური კორუფციული საქმის გახსნის შესახებ გაავრცელა ინფორმაცია. საქმე ეხება უკრაინის სახელმწიფო კომპანიის, „ენერგოატომის“ თანხების გაფლანგვას. სამართალდამცველებმა რამდენიმე ადამიანის სახლში ჩხრეკა ჩაატარეს. ჩხრეკა ჩატარდა იუსტიციის მინისტრის გერმან გალუშენკოს სახლშიც, რომელიც იუსტიციის მინისტრის თანამდებობის დაკავებამდე ქვეყნის ენერგეტიკის მინისტრის პოსტს იკავებდა.
სისხლის სამართლის საქმის ფიგურანტი აგრეთვე არის უკრაინის პრეზიდენტის ვოლოდიმირ ზელენსკის ახლო მეგობარი თემურ მინდიჩი, რომელმაც ქვეყანა უკვე დატოვა. გუშინ გალუშენკომ და უკრაინის ენერგეტიკის მინისტრმა სვეტლანა გრინჩუკმა გადადგომის შესახებ განცხადებები დაწერეს.