თურქული სამხედრო-სატვირთო თვითმფრინავის ჩამოვარდნის მიზეზი გამოძიების შემდეგ გაირკვევა. ამის შესახებ თურქეთის თავდაცვის სამინისტროს პრესსპიკერმა, ზეკი აქთურქმა განაცხადა.
„ჩვენი „C-130“-ის ტიპის სამხედრო-სატვირთო თვითმფრინავი, რომელშიც 20 სამხედრო იმყოფებოდა, მათ შორის ეკიპაჟის წევრები, აზერბაიჯანიდან აფრინდა, რათა ჩვენი „F-16“-ების ტექნიკური მომსახურე ეკიპაჟი ჩვენს ქვეყანაში ჩამოეყვანა, აზერბაიჯანის გამარჯვების დღის აღნიშვნის შემდეგ, 11 ნოემბერს აზერბაიჯან-საქართველოს საზღვარზე ჩამოვარდა. ამ ტრაგიკულ ინციდენტს ჩვენი ოცი გმირი თანამებრძოლი შეეწირა. ინციდენტის მიზეზი გამოძიების შემდეგ გაირკვევა“, – აცხადებს თავდაცვის სამინისტროს წარმომადგენელი.
აქთურქმა სამძიმარი გამოუცხადა ავიაკატასტროფაში დაღუპულთა ოჯახებს, თურქეთის შეიარაღებულ ძალებსა და მოსახლეობას.