ნამდვილი ახალი ამბავი თავად დანაშაულის ფაქტი არ არის, მნიშვნელოვანია ის, რომ დამოუკიდებელი ანტიკორუფციული ინსტიტუტები მუშაობენ, – ასე გამოეხმაურა უკრაინის პრეზიდენტის ოფისის ხელმძღვანელის მრჩეველი მიხაილ პოდოლიაკი უკრაინის ენერგეტიკის სექტორში გამოვლენილ კორუფციულ სქემას.
მისივე თქმით, მასშტაბური საგამოძიებო სამუშაოების ჩატარება უკრაინის ტრანსფორმაციას აჩვენებს.
„სამწუხაროდ, ენერგეტიკის სექტორში კორუფციული სქემის გამოძიების შესახებ ინფორმაცია გასაკვირი არ არის. ეს წარსულის ლოგიკური გამოძახილია, რა დროსაც კრემლმა ათწლეულების განმავლობაში შექმნა სისტემა, რათა უკრაინა თავისი გავლენის სფეროში შეენარჩუნებინა. კორუფცია მისი ერთ-ერთი მთავარი ინსტრუმენტი იყო და ამ მექანიზმის ნარჩენები დღემდე არსებობს, თუმცა, დღევანდელი სიტუაცია ფუნდამენტურად განსხვავებული ხასიათისაა. ნამდვილი ახალი ამბავი თავად დანაშაულის ფაქტი არ არის. მნიშვნელოვანია ის, რომ 2014 წლის შემდეგ შექმნილი დამოუკიდებელი ანტიკორუფციული ინსტიტუტები მუშაობენ. ის ფაქტი, რომ ასეთი გამოძიება დაიწყო, მასშტაბური საგამოძიებო სამუშაოები ტარდება და უმაღლეს დონეებზე ხაზს უსვამენ სამართლიანი განაჩენის საჭიროებას, დამაჯერებლად აჩვენებს უკრაინის ტრანსფორმაციას“, – წერს პოდოლიაკი სოციალურ ქსელ X-ში.
როგორც უკრაინის პრეზიდენტის ოფისის ხელმძღვანელის მრჩეველი აღნიშნავს, რუსული პროპაგანდა შეეცდება, გამოიყენოს ეს საკითხი უკრაინის დისფუნქციის დასამტკიცებლად. მისივე თქმით, სინამდვილეში, მიმდინარე პროცესები აჩვენებს არა სახელმწიფოს კოლაფსს, არამედ უკრაინის ინსტიტუციური საფუძვლების გამოცდაა.
„მაგრამ რეალობა საპირისპიროა: ის, რასაც ჩვენ ვუყურებთ, არ არის სახელმწიფოს კოლაფსი, არამედ მისი ახალი ინსტიტუციური საფუძვლების გამოცდა. ომის დროს ცოტა ქვეყანა შეძლებდა ასეთი შემთხვევების აღმოჩენას, გამოძიებას და საჯაროდ განხილვას. ჩვენ ვდგამთ რთულ, მტკივნეულ, მაგრამ აბსოლუტურად აუცილებელ ნაბიჯებს ევროკავშირთან ინტეგრაციის გზაზე“, – წერს პოდოლიაკი.
The news about an investigation into a corruption scheme in the energy sector is, unfortunately, not surprising. It is a logical echo of the past, in which the Kremlin spent decades building a system to keep Ukraine within its sphere of influence. Corruption was one of its main…
— Михайло Подоляк (@Podolyak_M) November 13, 2025