იტალიის ვიცე-პრემიერის განცხადებით, უკრაინისთვის დახმარების გაზრდა რუსეთთან ომის დასრულებას არ შეუწყობს ხელს. სალვინის თქმით, ამან შესაძლოა კორუფცია გააღვივოს კიდეც, – ამის შესახებ სააგენტო Reuters-ი წერს.
“როგორც ვხედავთ, თავი იჩინა კორუფციულმა სკანდალებმა, რომელშიც უკრაინის მთავრობაა ჩართული. ამიტომაც, არ ვისურვებდი, რომ იტალიელი მშრომელებისა და პენსიონერების ფული შემდგომი კორუფციის გასაღვივებლად იყოს გამოყენებული. არ მგონია, რომ [უკრაინისთვის] მეტი იარაღის გაგზავნა პრობლემას გადაჭრის. ვფიქრობ, ბოლო საათების განმავლობაში განვითარებული მოვლენები და რუსი სამხედროების წინსვლა იმაზე მიუთითებს, რომ ომის შეჩერება ყველას ინტერესებშია, პირველ რიგში კი – უკრაინის”, – აცხადებს მატეო სალვინი.
ცნობისთვის, უკრაინაში კორუფციული სკანდალის ფონზე, ქვეყნის იუსტიციისა და ენერგეტიკის მინისტრებმა 12 ნოემბერს თანამდებობა დატოვეს.