ოქტომბერში ეროვნულმა ბანკმა განაახლა მაკროეკონომიკური პროგნოზები და ჩვენი სცენარის მიხედვით, ველოდებით ინფლაციის ნორმალიზებას, რომელიც მომავალი წლიდან დაიწყებს 3%-ზე მიახლოებას, წელს კი, საშუალოდ 4.0 პროცენტი იქნება, – ამის შესახებ საქართველოს ეროვნული ბანკის პრეზიდენტმა, ნათია თურნავამ პარლამენტის საფინანსო-საბიუჯეტო კომიტეტზე, 2026-2028 წლების ფულად-საკრედიტო და სავალუტო პოლიტიკის ძირითადი მიმართულებების პროექტის წარდგენისას განაცხადა.
კომიტეტში სიტყვით გამოსვლისას, ნათია თურნავამ ყურადღება გაამახვილა წლიური ინფლაციის შედარებით გაზრდილ მაჩვენებელზე და განმაპირობებელ ფაქტორებზე.
თურნავას თქმით, მიზნობრივ, 3-პროცენტიან მაჩვენებელთან შედარებით, ინფლაციის ზრდას ძირითადად სურსათის ინფლაცია განაპირობებს, რაც ნაწილობრივ წინა წლის დაბალი საბაზო ეფექტისა და ეგზოგენური ფაქტორების ასახვაა. ხოლო სურსათის გამორიცხვით, ინფლაციის მაჩვენებელი და ამავდროულად, შედარებით ხისტი ფასების საზომები, რომლებიც კარგად ასახავენ გრძელვადიან ინფლაციურ მოლოდინებს, მიზნობრივ დონესთან ახლოს ნარჩუნდება.
მისივე თქმით, გამომდინარე იქიდან, რომ წინა ორი წელი ინფლაციის დონე იყო 3-ჯერ ნაკლები, ვიდრე მიზნობრივი 3%, ანუ 1.1%-ის დონეზე იყო, წელს, თუნდაც ამ დაბალი ბაზის გამო, ინფლაცია გადასცდა 3%-იან ნიშნულს. ნათია თურნავას განმარტებით, ამას დაემატა რამდენიმე გარე ფაქტორი, მაგალითად, საგარეო ბაზრებზე სხვადასხვა სასაქონლო კატეგორიის გაძვირება, მაგრამ ესაა ერთჯერადი ფაქტორები, რომელთა მილევაც უახლოეს თვეებშია მოსალოდნელი.
„მიმდინარე ცენტრალური სცენარით, ინფლაცია დროებით 3%-იანი მაჩვენებლის ზემოთ შენარჩუნდება და 2025 წელს საშუალოდ 4.0 პროცენტი იქნება. თუმცა საშუალოვადიან პერიოდში მკაცრი მონეტარული პოლიტიკის, ერთობლივი მოთხოვნის ნორმალიზაციისა და სურსათის ფასებიდან მომდინარე ინფლაციური ეფექტების მილევის პირობებში, ინფლაცია მიზნობრივი მაჩვენებლის გარშემო დასტაბილურდება“, – აღნიშნა თურნავამ.
ამასთან, ნათია თურნავას განცხადებით, ინფლაციური მოლოდინებიც არაა გაზრდილი, ვინაიდან 5.2%-იანი მაჩვენებელი ძირითადად მომდინარეობს მიწოდების ფაქტორებიდან და არა მოთხოვნის ზეწოლიდან. ნათია თურნავას თქმით, ასეთ დროს ცენტრალური ბანკები ნაკლებად რეაგირებენ ხოლმე, თუმცა ეროვნული ბანკი მზად არის, გაზარდოს რეფინანსირების განაკვეთი, თუკი ეს პროცესები გაგრძელდა.
„ჩვენი ნეიტრალური განაკვეთია 7%. დღეს გვიჭირავს 8% და ცენტრალური სცენარის მიხედვით, ესეც უნდა მოხდეს, თუ რაიმე გაუთვალისიწინებელი არ მოხდა. კვლავაც ვინარჩუნებთ შედარებით მკაცრ პოზიციას. 8%, მოგეხსენებათ, შედარებით მაღალია, ვიდრე ნეიტრალური დონე და ყურადღებით ვართ“, – აღნიშნა ნათია თურნავამ.