კულტურის მინისტრი თინათინ რუხაძე, იტალიის რესპუბლიკაში სამუშაო ვიზიტის ფარგლებში, წმინდა საყდრის კულტურისა და განათლების დიკასტერიის პრეფექტს, კარდინალ ჟოზე ტოლენტინო დე მენდონსას შეხვდა.
პრესსამსახურის ცნობით, შეხვედრაზე ხაზი გაესვა საქართველოსა და წმინდა საყდარს შორის არსებულ დიპლომატიურ ურთიერთობებს; საუბარი შეეხო კულტურის სფეროში მჭიდრო თანამშრომლობის მეტად გაძლიერების საკითხს, მათ შორის, კულტურული მემკვიდრეობის, საბიბლიოთეკო, სამუზეუმო და ლიტერატურის მიმართულებით.
თინათინ რუხაძემ წმინდა საყდრის კულტურისა და განათლების დიკასტერიის პრეფექტს კათოლიკური ეკლესიის საიუბილეო წელი მიულოცა და აღნიშნა, რომ საქართველოსთვის პატივია სახელმწიფო კამერული გუნდების მონაწილეობა საიუბილეო წელთან დაკავშირებით ორგანიზებულ ღონისძიებებში.
შეხვედრას ესწრებოდნენ წმინდა საყდართან (ვატიკანი) საქართველოს საგანგებო და სრულუფლებიანი ელჩი დავით მექვაბიშვილი, კულტურის სამინისტროს საერთაშორისო ურთიერთობების დეპარტამენტის უფროსი ზურაბ ბაკურაძე და წმინდა საყდრის კულტურისა და განათლების დიკასტერიის პრეფექტის თანაშემწეები.