უკრაინის პრეზიდენტის ადმინისტრაციის ყოფილი ხელმძღვანელი ანდრეი ერმაკი აცხადებს, რომ ფრონტის ხაზზე მიდის. ამის შესახებ ერმაკმა გადადგომის შემდეგ გამოცემა New York Post-თან ისაუბრა.
„მე პატიოსანი და წესიერი ადამიანი ვარ. ფრონტის ხაზზე მივდივარ და ნებისმიერი სადამსჯელო ზომისთვის მზად ვარ. ჩემი ღირსება შებღალეს და არ დაიცვეს, მიუხედავად იმისა, რომ 2022 წლის 24 თებერვლის შემდეგ კიევში ვიყავი. არ მინდა ზელენსკის პრობლემები შევუქმნა, ფრონტზე მივდივარ“, – უპასუხა ერმაკმა გამოცემას.
ერმაკმა გამოცემისთვის გაგზავნილ შეტყობინებაში არ დააკონკრეტა, თუ როდის აპირებს ფრონტის ხაზზე წასვლას და შეუერთდება თუ არა უკრაინის შეიარაღებულ ძალებს.
„მეზიზღება ჩემ მიმართ გამოთქმული სიბინძურე და კიდევ უფრო მეტად ზიზღს იწვევს იმ ადამიანების მხარდაჭერის ნაკლებობა, ვინც სიმართლე იცის“, – განაცხადა ერმაკმა.
ცნობისთვის, ანდრეი ერმაკმა უკრაინის პრეზიდენტის ადმინისტრაციის ხელმძღვანელის პოსტი 28 ნოემბერს დატოვა. იქამდე კი ერმაკის ოფისში ეროვნული ანტიკორუფციულმა ბიურომ ჩხრეკა ჩაატარა. რა საქმეზე მიმდინარეობდა ჩხრეკა, ოფიციალურად ჯერ არ გამოუცხადებიათ. ინფორმაცია დაადასტურა თავად ერმაკმაც. მისი თქმით, სამართალდამცველებთან თანამშრომლობს და ანტიკორუფციული ბიუროს ოფიცრებს „სახლზე სრული წვდომის უფლება“ მისცა.