კორუფციული სკანდალის გამო ყველაზე სანდო თანაშემწის დაკარგვისა და უკრაინის სამხედრო სტრატეგიის შესახებ მზარდი კითხვების შემდეგ, პრეზიდენტი გადადგომის პერსპექტივის წინაშე აღმოჩნდა. ამის შესახებ გამოცემა The Sunday Times წერს.
“20 ნოემბერს, უკრაინის პრეზიდენტის სასახლეში, ვოლოდიმირ ზელენსკიმ მისი პოლიტიკური ფრაქციის პარლამენტის დაახლოებით 200 წევრთან დახურული შეხვედრა გამართა. მის გვერდით იჯდა ანდრეი ერმაკი, მისი გავლენიანი ადმინისტრაციის უფროსი და სანდო რწმუნებული.
შეხვედრა მოიწვიეს უკრაინის ანტიკორუფციული სააგენტოების, NABU-სა და SAPO-ს მიერ გამოვლენილი ინფორმაციის განსახილველად, რომლებმაც რამდენიმე დღით ადრე ზელენსკის კაბინეტის მაღალი რანგის წევრების წინააღმდეგ მასშტაბური გამოძიება დაიწყეს და მათ სახელმწიფო საკუთრებაში არსებული ბირთვული ენერგიის კომპანიიდან 100 მილიონი დოლარის მითვისებასა და გათეთრებაში დასდეს ბრალი. ორი მინისტრი იძულებული გახდა გადამდგარიყო, ხოლო პრეზიდენტის ახლო მეგობარი და ბიზნესპარტნიორი ქვეყნიდან გაიქცა.” – წერს The Sunday Times.
გამოცემის ინფორმაციით, ამ შეხვედრაზე პრეზიდენტმა ერმაკი დაიცვა და უარი თქვა თანამდებობიდან მის გათავისუფლებაზე, თუმცა, ერთ კვირაში ყველაფერი შეიცვალა.
“ახლა ისმის კითხვა, შეძლებს თუ არა ზელენსკი გადაურჩეს თავისი ყველაზე სანდო მრჩევლის დაკარგვის გარდაუვალ შედეგს და საკმარისი იქნება თუ არა ეს სვლა ოპოზიციონერი პარლამენტის წევრებისა და უკრაინელი საზოგადოების დასაკმაყოფილებლად. ვითარების სირთულეს ომში ბოლო დროს მიღწეული სავარაუდო წარუმატებლობები კიდევ უფრო ამძიმებს – პოკროვსკის მთავარი ლოჯისტიკური ცენტრი რუსულმა ჯარებმა ამ თვის დასაწყისში ფაქტობრივად დაიკავეს და უკრაინაში, მიმდინარე სამშვიდობო მოლაპარაკებებს, ბევრი ადამიანი მოსკოვის წინაშე კაპიტულაციად აღიქვამს.” – წერს გამოცემა.
სტატიაში ასევე საუბარია ზელენსკის რეიტინგზეც და აღნიშნულია, რომ “პრეზიდენტის მოწონების რეიტინგი ბოლო კვირების განმავლობაში მნიშვნელოვნად დაეცა.”