ისრაელის პრემიერ-მინისტრმა ბენიამინ ნეთანიაჰუმ ქვეყნის პრეზიდენტს, იცხაკ ჰერცოგს შეწყალების თხოვნით ოფიციალურად მიმართა.
პრეზიდენტის ოფისის მიერ გავრცელებულ განცხადებაში აღნიშნულია, რომ თხოვნა იუსტიციის სამინისტროს შესაბამის დეპარტამენტს გადაეცა, რომელიც ქვეყნის მეთაურისთვის „ყველა შესაბამისი ორგანოს“ მოსაზრებას შეკრებს. ყველა საბუთის მიღების შემდეგ პრეზიდენტი „პასუხისმგებლობიანად და კეთილსინდისიერად განიხილავს თხოვნას“.
სოციალურ ქსელებში გამოქვეყნებულ ვიდეომიმართვაში ნეთანიაჰუმ განაცხადა, რომ პროცესი მის წინააღმდეგ უკვე თითქმის 6 წელია მიმდინარეობს, მაგრამ გამოძიების დაწყების შემდეგ „ფაქტობრივად არაფერი მომხდარა“. მისივე თქმით, ისრაელი „უზარმაზარი გამოწვევების წინაშე დგას“ და საფრთხის თავიდან ასაცილებლად ეროვნული ერთიანობაა საჭირო, მის წინააღმდეგ სასამართლო პროცესის გაგრძელება კი საზოგადოებას შიგნიდან ხლეჩს.
„ისევე როგორც ბევრი ამ ქვეყანაში, დარწმუნებული ვარ, რომ პროცესის დაუყოვნებლივი შეწყვეტა ხელს შეუწყობს დაძაბულობის შემცირებას და ფართო შერიგებას – იმას, რაც ჩვენს ქვეყანას ასე სჭირდება“, – განაცხადა ნეთანიაჰუმ.