მოლდოვის მთლიანი სახელმწიფო ვალი მიმდინარე წლის ოქტომბერში 1 მილიარდ 376.2 მილიონი ლეით (+1.1%) გაიზარდა და ახალ ისტორიულ მაქსიმუმს, 128 მილიარდ 649 მილიონ ლეის მიაღწია. ინფორმაციას ამის შესახებ ადგილობრივი მედია ავრცელებს.
საერთო ჯამში, 2025 წლის იანვარ-ოქტომბერში მოლდოვის მთლიანი სახელმწიფო ვალი 7 მილიარდ 255 მილიონი ლეით (+6%) გაიზარდა.
აღსანიშნავია, რომ მოლდოვის მთლიანი სახელმწიფო ვალის წინა ისტორიული მაქსიმუმი 127 მილიარდ 272.8 მილიონი ლეი იყო და 2025 წლის სექტემბრის ბოლოს დაფიქსირდა.
ფინანსთა სამინისტროს მონაცემებით, მოლდოვის მთლიანი სახელმწიფო ვალი 2024 წლის დეკემბრის ბოლოს 121 მილიარდ 394 მილიონ ლეის შეადგენდა.
2025 წლის იანვარ-ოქტომბერში სახელმწიფო ვალის მთლიანი მოცულობის ზრდა განისაზღვრა შიდა სახელმწიფო ვალის 4 მილიარდ 713.3 მილიონი ლეით (+10.7%) ზრდით, ასევე ლეიში გამოხატული საგარეო სახელმწიფო ვალის 2 მილიარდ 541.7 მილიონი ლეით (+3.3%) ზრდით.
ამავდროულად, მოლდოვის სახელმწიფო ვალის მთლიან მოცულობაში შიდა სახელმწიფო ვალის წილი 2025 წლის ოქტომბრის ბოლოს 37.8% იყო, ხოლო საგარეო სახელმწიფო ვალის წილი – 62.2%.
საერთო ჯამში, 2025 წლის ოქტომბრის ბოლოს მთლიანი სახელმწიფო ვალის წილი მშპ-ში შეფასდა 36.6%-ით.