საბერძნეთის საპორტო ქალაქ ვოლოსში ფერმერების საპორტესტო აქცია იმართება. ათობით ფერმერის დემონსტრაციის გამო, პორტის მუშაობა შეფერხდა. დემონსტრანტებს პორტთან მიყვანილი ჰყავთ ტრაქტორები. ფერმერთა პროტესტს შეუერთდნენ მეთევზეებიც.
საპროტესტო აქციის მონაწილეები აპროტესტებენ სასოფლო-სამეურნეო დახმარების გადახდის დაგვიანებას და გაზრდილ სამეწარმეო ხარჯებს. საუბარია 600 მილიონი ევროს ოდენობით ევროკავშირის დახმარებასა და სხვა სუბსიდიებზე.
ფერმერების პროტესტი საბერძნეთის მასშტაბით უკვე რამდენიმე დღეა, გრძელდება, რა დროსაც დემონსტრანტები იყენებენ ტრაქტორებსა და სატვირთო მანქანებს ავტომაგისტრალებისა და სასაზღვრო-გამშვები პუნქტების გადასაკეტად.
სატრანსპორტო მოძრაობაზე პროტესტის გავლენის შესამცირებლად, საბერძნეთის უზენაესმა სასამართლოს პროკურორმა გასცა იმ ფერმერების დაკავების განკარგულება, ვინც განზრახ უქმნის საფრთხეს სატრანსპორტო უსაფრთხოებას.
საბერძნეთში სასოფლო-სამეურნეო სუბსიდიების გამოყოფა კორუფციული გამოძიების გამო შეფერხდა. გამოძიების ფარგლებში დადგინდა, რომ ზოგიერთი ფერმერი სახელმწიფო მოხელეების დახმარებით აყალბებდა მიწის საკუთრების უფლებას დახმარების მისაღებად. მიმდინარე შემოწმების გამო შეყოვნდა შემდგომი დახმარების გამოყოფა.
დახმარების გამოყოფის შეყოვნებას ასევე დაემთხვა ცხვრის დაავადების გავრცელება, რის გამოც ბერძენ ფერმერებს ასობით ათასი ცხვრისა და თხის დახოცვა მოუწიათ.
საბერძნეთის მთავრობა აცხადებს, რომ მოლაპარაკებებისთვის ღიაა და ფერმერებს ბლოკადის დასრულებისკენ მოუწოდებს.