უკრაინის პრეზიდენტმა, ვოლოდიმირ ზელენსკიმ უკრაინაში საპრეზიდენტო არჩევნების ჩატარების საკითხზე უმაღლესი რადას წარმომადგენლებთან შეხვედრა გამართა.
ამის შესახებ ვოლოდიმირ ზელენსკიმ ტრადიციული ვიდეომიმართვის დროს განაცხადა.
ზელენსკი აცხადებს, რომ უკრაინის წინააღმდეგ სპეკულაციებს არ დაუშვებს და აღნიშნავს, რომ ქვეყანაში არჩევნების ჩატარების საკითხზე ზეწოლა ნამდვილად არ სჭირდება.
„მე არ დავუშვებ არანაირ სპეკულაციას უკრაინის წინააღმდეგ. და თუ ჩვენი პარტნიორები, მათ შორის ჩვენი საკვანძო პარტნიორი ვაშინგტონში, ამდენს და ასე კონკრეტულად საუბრობენ უკრაინაში არჩევნებზე – არჩევნებზე საომარი მდგომარეობის სამართლებრივი რეჟიმის პირობებში – მაშინ ჩვენ ყველა კითხვასა და ეჭვზე კანონიერი პასუხები უნდა გავცეთ. ეს ადვილი არ არის, მაგრამ ამაზე ზეწოლა ნამდვილად არ გვჭირდება“, – განაცხადა უკრაინის პრეზიდენტმა.
ამასთან, ვოლოდიმირ ზელენსკიმ აღნიშნა, რომ ამ საკითხთან დაკავშირებით წინადადებებს უკრაინელი დეპუტატებისგან ელოდება.
„უსაფრთხოების გამოწვევებზე რეაგირება დამოკიდებულია პარტნიორებზე, პირველ რიგში, ამერიკაზე, პოლიტიკურ და სამართლებრივ გამოწვევებს კი პასუხი უკრაინამ უნდა გასცეს. და ეს ასეც იქნება“, – აღნიშნავს უკრაინის პრეზიდენტი.