აშშ-ის პრეზიდენტის დონალდ ტრამპის ადმინისტრაციამ უკანასკნელ კვირებში ევროპელ კოლეგებს დოკუმენტები გადასცა, სადაც ასახულია ვაშინგტონის ხედვა უკრაინის აღდგენისა და მსოფლიო ეკონომიკაში რუსეთის დაბრუნების შესახებ. ინფორმაციას The Wall Street Journal-ი ავრცელებს.
გამოცემის ცნობით, აღნიშნული გეგმა უკრაინის კონფლიქტის მოგვარების სამშვიდობო დოკუმენტის დანართის სახითაა წარმოდგენილი.
ერთ-ერთ დოკუმენტში დეტალურად არის აღწერილი ამერიკის ფინანსური კომპანიებისა და სხვა საწარმოების გეგმები, თუ როგორ გამოიყენონ დაახლოებით 200 მილიარდი დოლარის ოდენობის გაყინული რუსული აქტივები უკრაინის აღსადგენად, მათ შორის მონაცემთა დამუშავების მსხვილი ცენტრის მშენებლობის მიზნით, რომელიც ზაპოროჟიეს ატომურ ელექტროსადგურს მიუერთდება, რომელსაც დღესდღეობით რუსეთი აკონტროლებს.
მეორე დოკუმენტში საუბარია იმაზე, თუ როგორ აპირებს აშშ რუსეთის ეკონომიკის კრიზისიდან გამოყვანას. კონცეფციის თანახმად, ამერიკული კომპანიები რუსეთის სტრატეგიულ დარგებში ინვესტიციებს განახორციელებენ. საუბარია იშვიათ წიაღისეულ ლითონებსა და არქტიკაში ნავთობის მოპოვებაზე. აშშ აგრეთვე აპირებს დაეხმაროს რუსეთს საკუთარი ენერგორესურსები დასავლეთ ევროპასა და სხვა ქვეყნებში გაყიდოს.
როგორც The Wall Street Journal-ი წერს, ზოგი ევროპელი ჩინოვნიკი, რომელიც გაეცნო აშშ-ის დოკუმენტებს, არ არის დარწმუნებული იმაში, რომ ამერიკული მხარის პოზიცია სერიოზულ შეფასებას საჭიროებს.
ერთ-ერთმა ევროპელმა მაღალჩინოსანმა ამერიკული ხედვა ღაზის სექტორში რივიერას აშენების შესახებ ტრამპის გეგმას შეადარა.
კიდევ ერთი ევროპელი ჩინოვნიკი აღნიშნავს, რომ ამერიკელების გეგმა რუსეთთან ეკონომიკური თანამშრომლობის შესახებ 1945 წლის კონცეფციას ჰგავს, როცა აშშ-მა და საბჭოთა კავშირმა მეორე მსოფლიო ომის შემდეგ ევროპა გაიყვეს: „ეს იალტას ჰგავს“.
როგორც გამოცემა აღნიშნავს, მოლაპარაკებების მაგიდაზე ახლა კამათის საგანს არა მხოლოდ უკრაინის საზღვრები, არამედ ბიზნესი წარმოადგენს, რის გამოც აშშ ევროპელ მოკავშირეებს უპირისპირდება.