სომხეთის პრემიერ-მინისტრის, ნიკოლ ფაშინიანის თვითმფრინავმა მოსკოვში დაშვება ვერ შეძლო და იძულებული გახდა, სანკტ-პეტერბურგში დამჯდარიყო. შესაბამის ინფორმაციას რუსული მედია ავრცელებს.
კერძოდ, ნიკოლ ფაშინიანის თვითმფრინავი დაახლოებით ერთი საათის განმავლობაში დაფრინავდა ტვერის ოლქის თავზე დაჯდომის ნებართვის მოლოდინში, საბოლოოდ, ის პულკოვოს აეროპორტში გადაამისამართეს.
მოგვიანებით, ნიკოლ ფაშინიანის ბორტი მოსკოვში ჩაფრინდა.
შეფერხების მიზეზი მოსკოვის რეგიონზე დრონებით მასირებული შეტევა გახდა.
რუსეთის თავდაცვის სამინისტროს ცნობით, რეგიონის თავზე 32 უპილოტო საფრენი აპარატი ჩამოაგდეს. იერიშის გამო მოსკოვის ოთხმა აეროპორტმა – შერემეტიევომ, დომოდედოვომ, ვნუკოვომ და ჟუკოვსკისკიმ დროებით მუშაობა შეაჩერა. უწყების ცნობით, სულ რუსეთის საჰაერო თავდაცვის სისტემებმა 287 უკრაინული დრონი გააუვნებელყვეს ან ჩამოაგდეს.
სომხეთის პრემიერ-მინისტრი ნიკოლ ფაშინიანი მოსკოვში, სადაც ევრაზიული ეკონომიკური კავშირის სამთავრობათაშორისო საბჭოს სხდომაში მონაწილეობს, ჰამბურგიდან გაემგზავრა.