უნგრეთის პრემიერ-მინისტრი აცხადებს, რომ ევროკავშირი დღეს გამართავს წერილობით კენჭისყრას გაყინულ რუსულ აქტივებთან დაკავშირებით, რაც ევროკავშირს გამოუსწორებელ ზიანს მიაყენებს.
ამის შესახებ ვიქტორ ორბანი სოციალურ ქსელ X-ში წერს.
ვიქტორ ორბანი კენჭისყრას უკანონოდ მიიჩნევს, რადგან, მისი თქმით, ეს აუქმებს გადაწყვეტილების ერთსულოვნების პრინციპით მიღების წესს.
„დღეს ბრიუსელელები კვეთენ რუბიკონს. შუადღით გაიმართება წერილობითი კენჭისყრა, რომელიც ევროკავშირს გამოუსწორებელ ზიანს მიაყენებს. კენჭისყრის საგანია გაყინული რუსული აქტივები, რაზეც ევროკავშირის წევრი სახელმწიფოები აქამდე ყოველ ექვს თვეში აძლევდნენ ხმას და ერთსულოვან გადაწყვეტილებას იღებდნენ. დღევანდელი პროცედურით, ბრიუსელელები კალმის ერთი მოსმით აუქმებენ ერთსულოვნების მოთხოვნას, რაც აშკარად უკანონოა. დღევანდელი გადაწყვეტილებით, ევროკავშირში კანონის უზენაესობა მთავრდება და ევროპის ლიდერები საკუთარ თავს წესებზე მაღლა აყენებენ. ევროკავშირის ხელშეკრულებების დაცვის ნაცვლად, ევროკომისია სისტემატურად არღვევს ევროპულ კანონმდებლობას. ის ამას აკეთებს უკრაინაში ომის გასაგრძელებლად, ომის, რომელშიც გამარჯვება აშკარად შეუძლებელია. ეს ყველაფერი ხდება დღის სინათლეზე, როცა ევროკავშირის გადაწყვეტილებების მიმღები ყველაზე მნიშვნელოვანი ორგანოს, რომელიც სახელმწიფოების და მთავრობების მეთაურებს აერთიანებს – ევროპული საბჭოს შეხვედრამდე ერთ კვირაზე ნაკლები რჩება“, – წერს ორბანი.
ვიქტორ ორბანის თქმით, უნგრეთი აპროტესტებს ამ გადაწყვეტილებას და კანონიერი წესების აღსადგენად იმოქმედებს.
„ევროკავშირში ამით კანონის უზენაესობას ბიუროკრატების მმართველობა ცვლის. სხვა სიტყვებით რომ ვთქვათ, ბრიუსელის დიქტატურა დამყარდა. უნგრეთი აპროტესტებს ამ გადაწყვეტილებას და ყველაფერს გააკეთებს კანონიერი წესრიგის აღსადგენად“, – აღნიშნავს უნგრეთის ლიდერი.