თურქეთის საგარეო საქმეთა სამინისტრო რუსეთის თავდასხმის შედეგად ოდესაში თურქეთის საკუთრებაში არსებული სამი გემის დაზიანებას ეხმაურება.
როგორც თურქეთის საგარეო უწყების განცხადებაშია აღნიშნული, ჩორნომორსკის პორტზე დღეს განხორციელებული შეტევა ადასტურებს აქამდე გამოთქმულ შეშფოთებას, რომ რეგიონში მიმდინარე ომი ვრცელდება შავ ზღვაზე, ასევე საფრთხეს უქმნის საზღვაო ნავიგაციის უსაფრთხოებას.
„ამ კონტექსტში ჩვენ კიდევ ერთხელ აღვნიშნავთ რუსეთსა და უკრაინას შორის ომის სწრაფი შეწყვეტის მნიშვნელობას. საჭიროა შეთანხმება, რომელიც მიმართული იქნება შავ ზღვაზე ესკალაციის თავიდან აცილებაზე, შეაჩერებს შეტევებს ენერგოობიექტებსა და პორტებზე შავ ზღვაზე, რადგან ეს საშიშროებას ქმნის გემებისთვის“, – აღნიშნულია განცხადებაში.
ცნობისთვის, უკრაინის საზღვაო ძალების წარმომადგენელმა სააგენტო „როიტერს“ განუცხადა, რომ რუსული მხარის შეტევამ ოდესაში მდებარე პორტებში თურქეთის საკუთრებაში არსებული სამი გემი დააზიანა. თავდასხმას სოციალურ ქსელში გამოეხმაურა უკრაინის პრეზიდენტი ვოლოდიმირ ზელენსკი, რომელმაც აღნიშნა, რომ იერიშებს არანაირი სამხედრო მიზანი არ ჰქონდა.