აფგან მუხტარლისა და მისი მეუღლისთვის დაზარალებულის სტატუსის მინიჭების მიზნით, მუხტარლის ადვოკატმა არჩილ ჩოფიკაშვილმა საქალაქო სასამართლოს სარჩელით მიმართა.
„ეს არის საჩივარი, რომლითაც ვითხოვთ საქალაქო სასამართლოდან, რომ დაზარალებულად ცნონ აფგან მუხტარლი სისხლის სამართლის კოდექსის 143-ე მუხლის, მეოთხე ნაწილით გათვალისწინებულ დანაშაულში. ასევე დაზარალებულად ცნონ ლეილა მუსტაფაევა, სისხლის სამართლის 154-ე მუხლით გათვალისწინებულ დანაშაულში. პროკურატურამ ამასთან დაკავშირებით დადგენილება დღემდე არ მიიღო. სწორედ ამიტომ, კანონის შესაბამისად ეს საჩივრდება საქალაქო სასამართლოში. აუცილებელია, რომ მათ ჰქონდეთ ეს სტატუსი. მხოლოდ ამის შემდეგ ექნებათ უფლებები. სასამართლოს აქვს 15-დღიანი ვადა. მთავარი გარემოებაა ის, რომ 29 მაისს ოთხმა ადამიანმა ძალის გამოყენებით ჩასვა „ოპელის“ მარკის ავტომობილში აფგან მუხტარლი და ის გაიტაცეს. ეს დასტურდება მოწმეების ჩვენებებით. ის ამჟამად აზერბაიჯანის ციხეშია და მისთვის შეფარდებული პატიმრობა შეფარდებულია როგორც პოლიტიკური პატიმრობა“, – განაცხადა ადვოკატმა.