აშშ-მა ბელარუსულ კალიუმზე დაწესებული სანქციები მოხსნა, – ამის შესახებ ბელარუსის საკითხებში აშშ-ის სპეციალურმა წარმომადგენელმა, ჯონ კოულმა განაცხადა.
როგორც ადგილობრივი მედია წერს, ალექსანდრ ლუკაშენკოსა და აშშ-ის სპეციალურ წარმომადგენელს შორის ორდღიანი მოლაპარაკებები გაიმართა, რის შემდეგაც კოულმა განაცხადა, რომ აშშ ბელარუსულ კალიუმზე სანქციებს ხსნის.
„პრეზიდენტ ტრამპის მითითებების შესაბამისად, აშშ კალიუმზე სანქციებს ხსნის. ვფიქრობ, ეს აშშ-ის მხრიდან ბელარუსისთვის ძალიან კარგი ნაბიჯია“, – განაცხადა კოულმა.
მისივე თქმით, აშშ-ის მიერ დაწესებულ სხვა სანქციებზე დისკუსიები გაგრძელდება.
„ორ ქვეყანას შორის ურთიერთობების ნორმალიზებასთან ერთად, სულ უფრო მეტი სანქცია მოიხსნება“, – აღნიშნა აშშ-ის წარმომადგენელმა.
ამასთან, კოულმა თქვა, რომ ბელარუსის პრეზიდენტისგან უკრაინაში კონფლიქტის მოგვარების შესახებ კარგი რჩევები მოისმინა.
„მე თქვენს პრეზიდენტთან სხვადასხვა საკითხზე ვისაუბრე. ის გვეხმარება, გვთავაზობს რჩევებს, თუ რა უნდა გავაკეთოთ რუსეთსა და უკრაინას შორის ომთან დაკავშირებით. მისი რჩევები ძალიან გონივრულია“, – განაცხადა კოულმა.
უკრაინაში კონფლიქტის მშვიდობიანი მოგვარებისკენ მიმავალ პროგრესსა და ამ პროცესში ბელარუსის როლთან დაკავშირებით ჯონ კოულმა ხაზი გაუსვა ალექსანდრ ლუკაშენკოსა და რუსეთის პრეზიდენტს, ვლადიმერ პუტინს შორის არსებულ კარგ ურთიერთობებს.
„თქვენს პრეზიდენტს ვლადიმერ პუტინთან ურთიერთობის ხანგრძლივი ისტორია აქვს და მას შეუძლია რჩევების მიცემა. ეს ძალიან სასარგებლოა ამჟამინდელ სიტუაციაში. ისინი მეგობრები არიან და აქვთ ისეთი დონის ურთიერთობა, რომელიც საჭიროა ასეთი საკითხების განსახილველად. ბუნებრივია, პრეზიდენტმა ვლადიმერ პუტინმა, შეიძლება, ზოგიერთი რჩევა მიიღოს, ზოგიერთი კი – არა, მაგრამ ეს პროცესის ხელშეწყობის გზაა“, – აღნიშნა კოულმა.