უკრაინის ყოფილმა საგარეო საქმეთა მინისტრმა, დმიტრო კულებამ განაცხადა, რომ უკრაინა, სავარაუდოდ, ახლო მომავალში ნატო-ს წევრი ვერ გახდება, ამიტომ უსაფრთხოების ალტერნატიული გარანტიების განხილვაა საჭირო.
კულებამ ვიდეომიმართვაში დაასახელა უსაფრთხოების სამი გარანტია: პირველი გარანტია – სისტემური და მასშტაბური იარაღის მიწოდება უკრაინის შეიარაღებული ძალებისთვის აშშ-ისა და ევროკავშირის მხრიდან.
„ზოგადი სიტყვების მაგივრად, რომ მომდევნო ათი წლის განმავლობაში ამერიკა და ევროპა მხარს დაუჭერენ უკრაინის შეიარაღებულ ძალებს, ეს ძალიან კონკრეტული უნდა იყოს“,- აღნიშნა უკრაინის ყოფილმა საგარეო საქმეთა მინისტრმა.
მეორე გარანტია – უკრაინის ევროკავშირში გაწევრიანება. დმიტრო კულებას აზრით, უკრაინის დაპყრობის საფრთხის აღმოსაფხვრელად ორი გზა არსებობს: რუსეთის გაქრობა ან უკრაინის ევროკავშირში გაწევრიანება, რათა ვლადიმერ პუტინმა გააცნობიეროს, რომ უკრაინა ბუფერული ზონა კი არა, ევროპის ნაწილია.
კულებას თქმით, მესამე გარანტიაა უკრაინის აღდგენა და მისი ფინანსური მხარდაჭერა მომდევნო წლებში.