ჩილეს საპრეზიდენტო არჩევნებში კონსერვატორმა ანტონიო კასტმა გაიმარჯვა. კასტი ჩილეს პრეზიდენტად კენჭისყრის მეორე ტურში აირჩიეს. მან ამომრჩეველთა ხმების 59%-ი მიიღო.
ანტონიო კასტი პინოჩეტის მმართველობის დროიდან პირველი ულტრამემარჯვენე ლიდერი გახდება, რომელიც ჩილეს პრეზიდენტის თანამდებობას დაიკავებს.
საარჩევნო კამპანიის დროს კასტი ასობით ათასი მიგრანტის ქვეყნიდან გაძევების პირობას დებდა. ანტონიო კასტის მეტოქე იყო ჩილეს კომუნისტური პარტიის წევრი ჟანეტ ჰარა. მან მარცხი უკვე აღიარა.
ანტონიო კასტს არჩევნებში გამარჯვება უკვე მიულოცა აშშ-ის სახელმწიფო მდივანმა.
„აშშ-ს იმედი აქვს ჩილეს ადმინისტრაციასთან თანამშრომლობის, რეგიონული უსაფრთხოების განმტკიცების მიზნით და ჩვენი სავაჭრო ურთიერთობების გასააქტიურებლად“, – წერს მარკო რუბიო სოციალურ ქსელში.
ანტონიო კასტის ინაუგურაცია 11 მარტს გაიმართება.