რუსეთის პრეზიდენტის პრესმდივანი დიმიტრი პესკოვი აცხადებს, რომ ნატო-ში უკრაინის არგაწევრიანება ერთ-ერთი საკვანძო საკითხია. ამის შესახებ კრემლის წარმომადგენელმა მედიას განუცხადა.
„ცხადია, ეს საკითხი არის ერთ-ერთი ქვაკუთხედი და, რა თქმა უნდა, ის განსაკუთრებულ განხილვას საჭიროებს სხვა საკითხების ფონზე“, – აღნიშნა დიმიტრი პესკოვმა.
კრემლის პრესმდივანი მიიჩნევს, რომ აშშ-ის პრეზიდენტი დონალდ ტრამპი გულწრფელად მუშაობს კონფლიქტის დარეგულირებაზე.
„მუშაობა მიმდინარეობს აშშ-ის მომლაპარაკებლებს, ევროპელებსა და უკრაინელებს შორის. უკვე მას შემდეგ, რაც ისინი დაასრულებენ სამუშაოს თავიანთ ნაწილს, ჩვენ დაველოდებით, რომ ჩვენი ამერიკელი თანამოსაუბრეებისგან მივიღებთ იმ ხედვას, რომელიც დღეს ბერლინში განიხილება“, – თქვა დიმიტრი პესკოვმა.
კრემლის პრესსპიკერმა ასევე აღნიშნა, რომ პუტინი ღიაა მშვიდობისა და სერიოზული გადაწყვეტილებებისთვის და არ დაუჭერს მხარს ხრიკებს, რომელთა მიზანია დროებითი შესვენების შექმნა.