გერმანიის კანცლერმა, ფრიდრიხ მერცმა უკრაინის პრეზიდენტთან, ვოლოდიმირ ზელენსკისთან ერთობლივი პრესკონფერენცია ამერიკის შეერთებული შტატების პრეზიდენტის, დონალდ ტრამპის სამშვიდობო ძალისხმევის ქებით დაიწყო.
მერცის თქმით, ამერიკის პრეზიდენტის გარეშე, ბერლინში გამართული მოლაპარაკებების დროს დადებითი დინამიკა არ იქნებოდა.
„ჩვენ გვაქვს უკრაინაში რეალური მშვიდობის დამყარების შანსი“, – აღნიშნა გერმანიის მთავრობის მეთაურმა.
„ჩვენ ვიცით ომის ფასი და ვიცით მშვიდობის ფასიც“, – თქვა კანცლერმა და ხაზი გაუსვა აშშ-ის სპეციალური წარმომადგენლის, სტივ უიტკოფისა და ტრამპის სიძის, ჯარედ კუშნერის დიპლომატიურ ძალისხმევას.
მერცმა იმედი გამოთქვა, რომ საღამოს ევროპელ ლიდერებთან დაგეგმილი ვახშმის დროს შემდგომი პროგრესი იქნება მიღწეული. მისი თქმით, ტერიტორიული დათმობები კვლავ ძირითად საკითხად რჩება.