უნგრეთის საგარეო საქმეთა მინისტრი პიტერ სიიარტო ბრიუსელს საომარ ფანატიზმსა და ევროკავშირის წევრი სახელმწიფოების ომში ჩართვის მცდელობაში ადანაშაულებს.
სიიარტოს თქმით, ევროკავშირი საკუთარი წესების დარღვევაზეც კი მიდის იმისთვის, რათა კონტინენტი ომში ჩაითრიოს.
უნგრეთის პირველმა დიპლომატმა ბრიუსელში საგარეო საქმეთა მინისტრების საბჭოზე უკრაინის მხარდაჭერასთან დაკავშირებით განხილული საკითხები გააკრიტიკა.
უნგრეთი უკრაინის ევროკავშირში გაწევრიანებასა და ბრიუსელსა და კიევს შორის სამხედრო ურთიერთობების გაღრმავებას ეწინააღმდეგება.
„ევროპისთვის საკუთარ წესებსაც აღარ აქვს მნიშვნელობა. ბრიუსელი მზად არის ყველა წესი დაარღვიოს, რათა ევროპის მთელი კონტინენტი ომში ჩაითრიოს. ის, რაც ბრიუსელში ხდება, მხოლოდ სამხედრო ფანატიზმად შეიძლება შეფასდეს. ბრიუსელსა და რამდენიმე ევროპულ დედაქალაქში გადაწყვიტეს, რომ ევროპელი ხალხი გადაიხდის უკრაინის სახელმწიფოს ფუნქციონირებისთვის, უკრაინის არმიის შეიარაღებისთვის და ომისთვის. ევროკავშირის სამხედრო-სასწავლო მისიის უკრაინაში გადატანის იდეა ესკალაციის რისკია, რაც უნგრელ ხალხს საფრთხეს უქმნის. ის, რაც ახლა ხდება, სამხედრო სიგიჟეა, რომელიც ცდილობს ევროკავშირის ყველა ქვეყანა ომში ჩაითრიოს“, – თქვა სიიარტომ.