ბელგიამ უარყო ევროკომისიის მიერ შეთავაზებული დათმობები უკრაინისთვის გაყინული რუსული აქტივებით დაფინანსებული 210 მილიარდი ევროს ოდენობის სესხის გასაცემად.
როგორც POLITICO წერს, ამან ეჭვქვეშ დააყენა 18 დეკემბერს დაგეგმილ ევროკავშირის ლიდერთა სამიტამდე შეთანხმების მიღწევის შესაძლებლობა.
ევროკომისია ცდილობს დაარწმუნოს წევრი ქვეყნები, მხარი დაუჭირონ კრედიტს, რათა რუსეთის მილიარდობით ევროს რეზერვები, რომლებიც ბრიუსელში, Euroclear-ის დეპოზიტარიუმში ინახება, გამოყენებული იყოს უკრაინის ეკონომიკის მხარდასაჭერად.
რამდენიმედღიანი მოლაპარაკებების შემდეგ, ევროკომისიამ ბელგიის მხარდაჭერის უზრუნველსაყოფად თავის ინიციატივაში სამართლებრივი ცვლილებები შესთავაზა. კერძოდ, ქვეყანას გარანტირებული ჰქონდა 210 მილიარდ ევრომდე თანხის გამოყენების შესაძლებლობა რუსეთის მხრიდან სამართლებრივი დავების ან შესაძლო ზეწოლის შემთხვევაში.
ასევე შეთავაზებული იყო, რომ უკრაინისთვის ფული არ გადაეცათ მანამ, სანამ ევროკავშირის ქვეყნები არ უზრუნველყოფდნენ ფინანსურ გარანტიებს გადასახდელების, სულ მცირე, 50%-ზე. გარდა ამისა, ევროკომისიამ დაავალა ყველა წევრ ქვეყანას, შეეწყვიტათ რუსეთთან ორმხრივი საინვესტიციო შეთანხმებები, რათა ბელგია არ დარჩენილიყო მარტო მოსკოვის შესაძლო ზეწოლის შემთხვევაში.
თუმცა, ოთხმა ევროპელმა დიპლომატმა POLITICO-ს განუცხადა, რომ ბელგია ამ გარანტიებს არასაკმარისად მიიჩნევს.
„ევროკავშირის სამიტამდე შეთანხმება არ იქნება მიღწეული“, – აღნიშნა ერთ-ერთმა დიპლომატმა.
აღნიშნულია, რომ ბელგიის მთავრობა შიშობს, რომ თუ რუსული აქტივები გამოყენებული იქნება, ქვეყანა შესაძლოა იძულებული გახდეს მთელი თანხა დააბრუნოს, თუ რუსეთი ამ თანხების გადარიცხვის გასაჩივრებას შეეცდება.