ისრაელმა 37 ჰუმანიტარულ ორგანიზაციას ღაზაში საქმიანობა აუკრძალა.
მედიის ცნობით, აღნიშნულ ორგანიზაციებს შორისაა „ექიმები საზღვრებს გარეშე“.
ისრაელის განცხადებით, აკრძალვის დაწესების მიზეზი ჰუმანიტარული ორგანიზაციების მიერ რეგისტრაციის ახალი წესების შეუსრულებლობაა. ახალი რეგულაციების თანახმად, ნებისმიერ ორგანიზაციას, რომელიც „ისრაელის წინააღმდეგ ბოიკოტისკენ მოუწოდებს, უარყოფს 7 ოქტომბრის თავდასხმას ან მხარს უჭერს ისრაელის ლიდერების ან ჯარისკაცების წინააღმდეგ სასამართლო საქმეებს“, ღაზის სექტორში მუშაობა ეკრძალება.
კიდევ ერთი მოთხოვნაა, რომ ჰუმანიტარულმა ჯგუფებმა დაარეგისტრირონ თავიანთი თანამშრომლების სახელები.
ისრაელის დიასპორის საქმეთა სამინისტრომ განაცხადა, რომ 37-მა ჯგუფმა არ დაიცვა წესები და მათი საქმიანობა შეჩერდება. ეს ღაზაში მოქმედი ორგანიზაციების დაახლოებით 15%-ია.