„იმედის“ მაყურებელმა დღეს მეგაშოუს „ვინ ვინ არის“ მე-5 სეზონის მე-8 ეპიზოდი იხილა.
დღევანდელ ეპიზოდში მაყურებლის წინაშე 3 თოჯინა: მინოტავრი, ფარშევანგი და ლაზიერი წარდგნენ. მათ დუეტები ჟიურის წევრებთან ერთადაც შეასრულეს. კერძოდ, ფარშევანგმა – ანრი ჯოხაძესთან; მინოტავრმა – ლიზა ბაგრატიონთან, ხოლო ლაზიერმა – მანიკა ასათიანთან.
ამასთან, მეგაშოუში წინა სეზონის გამარჯვებულმა კენგურუმაც, გია ბაღაშვილმაც შეასრულა ერთი ნომერი.
ფინალისტებიდან ამჯერად შოუში გამარჯვებული მხოლოდ გულშემატკივრებმა გამოავლინეს. ჟიურის წევრები ხმის მიცემაში აღარ მონაწილეობდნენ. თუმცა, ბოლო ეპიზოდში მათ თავიანთი ვერსიები წარმოადგინეს, თუ ვის მოიაზრებდნენ კონკრეტული ნიღბის ქვეშ.
მე-3 ადგილის მფლობელი და ბრინჯაოს პრიზიორი გახდა ფარშევანგი. ამ ნიღბის ქვეშ იმალებოდა სოპრანო იანო ალიბეგაშვილი.
მე-2 ადგილის მფლობელი მინოტავრი გახდა. მისი ნიღაბი მომღერალ გიორგი ძოწენიძეს ჰქონდა მორგებული.
„ვინ ვინ არის“ გამარჯვებული კი ლაზიერი გახდა. მისი ნიღაბი მომღერალ ნატო მეტონიძეს ჰქონდა მორგებული. მას მთავარი პრიზი, ბინა ბათუმში გადაეცა.
ამასთან, მეორე და მესამე ადგილებზე გასულებს „ავერსმა“ 10 ათას-10 ათასი ლარი გადასცა. ასევე, რადიო „იმედმა“ მე-3 ადგილზე გასულს – 1000 ლარი. ფინალისტებისთვის პრიზები დაწესებული ჰქონდათ სხვა კომპანიებსაც.
მეგაშოუს წინა სეზონებში საზოგადოებისთვის არაერთმა ცნობილმა სახემ მიიღო მონაწილეობა. ყოველ ორშაბათს „იმედის“ ეთერში სრულიად საქართველო ელოდებოდა, გაერკვია, ვინ ახერხებდა გარდასახვას 10 ახალი თოჯინათი. 8 კვირის განმავლობაში ისინი ცდილობდნენ, მათი ვინაობა ვერავის გაეგო, მთელი საქართველო კი ამ დროის განმავლობაში დეტექტივად იყო გადაქცეული.