უკრაინის პრეზიდენტმა, ვოლოდიმირ ზელენსკიმ მთავარი სადაზვერვო სამმართველოს უფროსის თანამდებობაზე, კირილ ბუდანოვის ნაცვლად, ოლეგ ივაშჩენკო დანიშნა. მანამდე ივაშჩენკო საგარეო სადაზვერვო სამსახურის ხელმძღვანელი იყო.
„დღეიდან ოლეგ ივაშჩენკო გააგრძელებს ჩვენი ქვეყნის სამსახურს და რუსული სამხედრო პოტენციალის შეზღუდვის ამოცანის შესრულებას“, – წერს ზელენსკი სოციალურ ქსელში.
როგორც ზელენსკიმ აღნიშნა, ივაშჩენკოსთან შეხვედრისას მას უკრაინაში არსებული საერთო მდგომარეობისა და არსებული საფრთხეების შესახებ ინფორმაცია მიაწოდა.
„ჩვენ გავაგრძელებთ რუსეთის ეკონომიკური პოტენციალის შემცირებაზე ფოკუსირებას – რაც უფრო ნაკლებს გამოიმუშავებს აგრესორი, მით უფრო მეტი შესაძლებლობა იქნება დიპლომატიისთვის. ეს განსაკუთრებით ეხება რუსული ნავთობის ექსპორტს, რომელიც შეიზღუდება და გაიაფდება. ჩვენ მსგავს მიდგომას ვიყენებთ რუსული სამხედრო წარმოების მიმართ. რაც უფრო მეტად გავწყვეტთ აგრესორის კავშირებს მსოფლიოსთან და მისი სანქციების დარღვევის სქემებს, მით უფრო დიდი იქნება ომის დასრულების მცდელობების პოტენციალი. მადლობელი ვარ უსაფრთხოების სამსახურის ამ სფეროში მუშაობისა და შესაბამისი ინფორმაციისთვის“, – აღნიშნა ზელენსკიმ.
მანამდე უკრაინის პრეზიდენტმა, ვოლოდიმირ ზელენსკიმ კირილ ბუდანოვი ოფისის ხელმძღვანელის თანამდებობაზე დანიშნა. პრეზიდენტის თქმით, ახალ თანამდებობაზე ბუდანოვი ყურადღებას გაამახვილებს უსაფრთხოების საკითხებზე, უკრაინის თავდაცვის ძალებისა და უსაფრთხოების განვითარებაზე, ასევე მოლაპარაკებების დიპლომატიურ გზაზე.
თავად ბუდანოვმა განაცხადა, რომ მიიღო ზელენსკის წინადადება და აღნიშნა, რომ მისი მუშაობა ფოკუსირებული იქნება „სტრატეგიული უსაფრთხოების კრიტიკულად მნიშვნელოვან საკითხებზე“.