“ტრამპის გზავნილი არის უგუნური და სახიფათო, ირანის დიდებული ხალხი მათ შიდა საქმეებში ჩარევას მტკიცედ უარყოფს, ჩვენი შეიარაღებული ძალები მზადყოფნაში არიან”

ირანის საგარეო საქმეთა მინისტრი აბას არაღჩი აშშ-ის პრეზიდენტის, დონალდ ტრამპის განცხადებებს „უგუნურს და სახიფათოს“ უწოდებს.

მანამდე აშშ-ის პრეზიდენტი ისლამური რესპუბლიკის ქუჩებში გამოსული მომიტინგეების სასარგებლოდ ჩარევით დაიმუქრა და განაცხადა: „ირანი მშვიდობიან მომიტინგეებს თუ ესვრის და ძალადობრივად დახოცავს, შეერთებული შტატები მათ დასახმარებლად მივა, ჩვენ მზად ვართ“.

ირანის საგარეო უწყების ხელმძღვანელის განცხადებით, ირანში ვალუტის კურსის დროებითი ცვალებადობით დაზარალებულები ბოლო დროს მშვიდობიან პროტესტს ატარებენ, რაც, მისი მტკიცებით, მათი უფლებაა. ამავდროულად, არაღჩი აღნიშნავს, რომ ამისგან განსხვავებით, იყო ძალადობრივი არეულობის ცალკეული შემთხვევები, მათ შორის პოლიციის განყოფილებაზე თავდასხმები და პოლიციელებისთვის ე.წ. მოლოტოვის კოქტეილების სროლა.

ირანის საგარეო საქმეთა მინისტრის თქმით, საზოგადოებრივ საკუთრებაზე კრიმინალური თავდასხმები დაუშვებელია.

„სწორედ ამიტომ პრეზიდენტ ტრამპის დღევანდელი გზავნილი, რომელზეც, სავარაუდოდ, გავლენა იქონიეს მათ, ვისაც დიპლომატიის ეშინიათ ან შეცდომად მიაჩნიათ, არის არასაჭირო, უგუნური და სახიფათო. როგორც წარსულში, ირანის დიდებული ხალხი მტკიცედ უარყოფს ნებისმიერ ჩარევას მათ შიდა საქმეებში. ანალოგიურად, ჩვენი ძლიერი შეიარაღებული ძალები მზადყოფნაში არიან და ზუსტად იციან, სად უნდა მიიმართონ ირანის სუვერენიტეტის ნებისმიერი დარღვევის შემთხვევაში“, – აღნიშნავს აბას არაღჩი.